Беларускі гісторык, гід і краязнаўца-аматар Юры Куўшынаў жыве ў Польшчы і праводзіць экскурсіі па вуліцах Варшавы. MOST паразмаўляў з беларусам і даведаўся, што сабой уяўляе шпацыр, колькі ён каштуе і як на яго патрапіць.
«Адкрываеш для сябе таямніцы мінулага і сучасанага»
Юры Куўшынаў скончыў гістарычны факультэт БДУ, потым вучыўся на курсах менеджэра па турызму. Працаваў у Музеі гісторыі Вялікай Айчыннай вайны ў Мінску, дзе атрымаў добры экскурсійны досвед.
— У Беларусі пачаў вадзіць экскурсіі спачатку па Менску. Распрацаваў агулам больш за 20 маршрутаў рознага кшталту. Усё ж родны горад, і для другіх, і для сябе яго нібы нанова адкрываў. Крыху пазней пачаў вазіць экскурсіі па Беларусі і індывідуальныя замовы, і праз супрацу з турагенцтвамі.
У Беларусі Юры наведваў розныя гіды, якія паслужылі «першым штуршком» і далі «пэўнае натхненне на справу».
— Сам для сябе таямніцы мінулага і сучаснага адкрываеш, і перадаеш максымальна зразумела і цікава іншым. Гісторыя заўжды была ў прыярытэце інтарэсаў.
«Адчуць горад з яго асаблівасцямі»
Пасля пераезду ў Варшаву восенню мінулага года Юры адразу дэталёва паглыбіўся ў вывучэнне гораду: праз экскурсіі і літаратуру. А потым беларус пачаў сам праводзіць экскурсіі па сталіцы Польшчы.
— Экскурсіі па Варшаве пачаў праводзіць сёлета, ад студзеня. А дакладней, менавіта 14 студзеня адбыўся дэбют. Першая экскурсія была прысвечана беларускім месцам у Варшаве, называлася «Беларуская Варшава». На цяперашні момант яна складаецца з 2 частак, якія я чаргую раз на два тыдні.
Юры кажа, што стараецца «максымальна спасцігаць і адчуць горад, з ягонымі асаблівасцямі і цікавінкамі».
Посмотреть эту публикацию в Instagram
Экскурсія за данаты
Шпацыры па Варшаве, як і па Мінску, беларус праводзіць за данаты.
— Звычайна два ці тры на тыдзень. У Instagram і Telegram я выкладаю анонс на выходныя, пішу, каб людзі пазначаліся пры жаданні наведаць.
Маршрут экскурсіі выбудоўваецца ў залежнасці ад тэмы. Падчас распрацоўкі Юры адзначае пункты для прагляду, стараецца зрабіць між імі пераходы.
— Калі, для прыкладу, браць «Беларускую Варшаву», то тут я шукаў мясціны звязаныя з Беларуссю ці ўраджэнцамі Беларусі, і добра, што ў межах Старога гораду і Кракаўскага прадмесця яны ў добрай дасяжнасці.
Па адлегласці маршрут павінен быць 4 км, а па часе — 2 гадзіны.
— Каб людзі не стамляліся і штосьці захавалася ў галовах. Вядома, надвор’е ўлічваю. Узімку шпацыры не даўжэй за паўтары гадзіны.
Акрамя шпацыраў у фармаце зборных груп, беларус таксама праводзіць індывідуальныя экскурсіі.
— Тады замоўнік сам абірае час, маршрут і іншыя нюансы. Кошты дамоўныя, колькасьць наведнікаў пры замове — ад аднаго да сарака чалавек.
У планах праводзіць па-польску
Шпацыры па Варшаве Юры праводзіць па-беларуску, толькі адна была па-расійску. Удзельнікамі экскурсій у асноўным з’яўляюцца беларусы Варшавы, а таксама іншых гарадоў Польшчы і краін Еўропы.
— Маюцца турысты з Беларусі, якія ці першы раз у Варшаве, ці ўжо былі, але грунтоўна не шпацыравалі.
Акрамя беларусаў бываюць і украінцы, якія «вельмі камфортна ўспрымаюць інфармацыю па-беларуску».
— Маю планы і мэты вадзіць экскурсіі па-польску, як падцягну мову да належнага ўзроўню.
Анонсы шпацыраў з’яўляюцца кожную сераду на старонках Юрыя ў Instagram і Telegram.
* * *
Ці па тэлефоне: +48 780 792 440
