У неядзелю, 21 мая, беларусы Польшчы правялі акцыі салідарнасці з нагоды Дня палітвязня ў Беларусі і памяці актывіста Вітольда Ашурка. MOST расказвае, што адбывалася ў гэты дзень у польскіх гарадах.
21 мая 2021 года ў шклоўскай калоніі № 17 пры нявысветленых абставінах загінуў палітзняволены актывіст з Бярозаўкі Вітольд Ашурак. На знак памяці Вітольда 21 мая адзначаецца як Дзень салідарнасці з палітвязнямі. У гэтым годзе беларусы таксама выйшлі на вуліцы польскіх гарадоў, каб падтрымаць палітвязняў.
Беласток
Больш за 100 асобаў прынялі ўдзел у акцыі з нагоды міжнароднага дня палітвязняў і дня смерці Вітольда Ашурка ў Беластоку. Беларусы выйшлі з партрэтамі палітзняволеных. У знак салідарнасці з тымі, каго рэжым Лукашэнкі прызнаў «экстрэмістамі», удзельнікі акцыі прычапілі жоўтыя біркі.
На акцыі выступілі Сяргей Верамеенка, Ян Роман, Уладзімір Хільмановіч, Вольга Верамеенка, Алена Вішнеўская, іншыя грамадскія актывісты.
Варшава
У памяць Вітольда Ашурка беларускі моладзевы хаб супольна з праваабарончым цэнтрам «Вясна» зладзілі акцыю.
Таксама перад беларусамі выступілі былы палітвязень і кандыдат у прэзідэнты Беларусі Андрэй Саннікаў, галоўны рэдактар Gazeta Wyborcza Адамі Міхнік, сяброўка Вітольда Ашурка Вольга Быкоўская, а таксама польскія і беларускія палітыкі і праваабаронцы. Амбасадар Польшчы ў Беларусі Артур Міхальскі звярнуўся да ўдзельнікаў акцыі па-беларуску.
Удзельнікі акцыі таксама пайшлі шэсцем праз цэнтр Варшавы ў бок Старога гораду, дзе каля помніка Каперніка зладзілі ланцуг салідарнасці з беларускімі палітзняволенымі. Арганізатарамі ланцугу выступілі Народнае антыкрызіснае ўпраўленне, а таксама ініцыятывы «Беларусы Варшавы» і DissidentBY.
Уроцлаў
Больш за 100 чалавек сабралася на рынкавай плошчы ў цэнтры Уроцлава. Там агучылі імёны загінулых і закатаваных беларусаў, у тым ліку гісторыю Вітольда Ашурка.
На плошчы таксама можна было ўбачыць партрэты ўсіх палітвязняў Беларусі.
Кракаў
21 мая беларусы Кракава разам чыталі лісты палітвязняў, працаваў вольны мікрафон, а кожны жадаючы мог прачытаць на стэндах інфармацыю пра вязняў і тое, як можна іх падтрымаць.
Люблін
У Любліне адбыўся перформанс «камера», пад час якога зачыталі кавалкі гісторый арыштантаў на Акрэсціна
— Знаходзячыся тут, за мяжой, мы можам падтрымліваць адно аднаго, палітвязняў і іх сем’і, рабіць усё, што ў нашых сілах, каб сотні тысяч людзей зноў пабачылі свае сем’і і вярнуліся на Радзіму. Не важна, якое ў нас грамадзянства, няма розніцы, на якой мове мы размаўляем, якога колеру ў нас скура, у што мы верым і каго кахаем. Толькі разам мы можам спыніць знішчэнне чалавека і яго свядомасці, — кажуць беларусы.
Дзясяткі людзей прынялі ўдзел у акцыях у Гданьску, Познані, Любліне, Шчэціне, Торуні, Катавіцах і Быдгашчы.
На сённяшні момант, паводле праваабарончага цэнтра «Вясна», ў Беларусі налічваецца 1 525 палітычных вязняў.
