У Беластоку 14 ліпеня афіцыйна адкрылі Сквер Вольнай Беларусі. У сімвалічным адкрыцці паўдзельнічалі прэзідэнт горада Тадэвуш Трускаляскі і лідэрка дэмакратычных сіл Беларусі Святлана Ціханоўская.
Тое, што ў гэтым скверы знаходзiцца беларускае консульства ў Беластоку, Святлана Ціханоўская лiчыць сiмвалiчным. Тут ладзяць акцыi i беларускiя актывiсты.
«Для беларусаў гэтае месца амаль святое. Сюды яны прыходзiлi, каб ушанаваць памяць тых, хто загiнуў, каб падтрымаць беларусаў — нашых палiтзняволенных. I зараз iм [супрацоўнiкам консульства. — MOST] будзе удвая “прыемней” быць на скверы Вольнай Беларусi», — адзначыла Ціханоўская.
Па яе словах, адкрыццё сквера — гэта вельмi сiмвалiчна i вельмi важна як жэст салiдарнасцi.
«Зараз мы можам кожнай краiне сказаць: «Ведаеце, ужо знайшлicя тыя, хто асмелiўся гэта зрабiць… А калi ўжо ёсць прэцэдэнт, то далей ужо пойдзе лепей».
Падчас вiзiта Ціханоўская сустракаецца з шэрагам афiцыйных асоб: прэзiдэнтам Беластока, а таксама маршалкам ваяводства.
«У мяне ёсць шэраг пытанняў, якiя задаюць беларусы Беласточчыны i беларуская меншасць тут. Гэта адукацыйныя пытаннi, пытаннi падтрымкi культурных iнiцыятываў. Але, канешне, я сюды прыехала са словамi ўдзячнасцi перш за ўсё. Нягледзячы на тое, што ў нейкiя моменты ўзнiкаюць праблемы, але ж я бачу, як тут адносяцца да беларусаў», — сказала дэмакратычная лiдэрка.
Яна таксама выказалася наконт фестывалю Tutaka, якi распачынаецца на Падляшшы. Яна патлумачыла важнасць гэтай падзеi. «Зараз у Беларусi праводзiцца вiдавочная русiфiкацыя. Усё, што звязана з беларускiм, знiшчаецца, гiсторыя перапiсваецца. Мы павiнны зараз узмацняць нашу нацыянальную iдэнтычнасць i захоўваць тое, што маем», — адзначыла Ціханоўская.
Гісторыя са скверам Вольнай Беларусі цягнулася амаль цэлы год. Гэты сквер на сёння самы маленькі ў Беластоку. Ён займае плошчу ў дзясятак метраў перад беларускім консульствам.
Першапачаткова дарадцы Беластока планавалі перайменаваць усю вуліцу Электрычную, дзе знаходзiцца беларускае консульства. Аднак сутыкнуліся з пратэстам мясцовых жыхароў, якім давялося б мяняць дакументы ў выніку такога перайменавання.
Вольная Беларусь ад Латушкі і дыяспары
У сакавіку 2022 года кіраўнік НАУ Павел Латушка прапанаваў прэзідэнту Беластока Тадэўшу Трускаляскаму парайменаваць вуліцу Электрычную ў вуліцу Вольнай Беларусі. Ідэю падхапіла дыяспара.
«Дзякуем прэзідэнту Беластока і радзе горада за падтрымку ініцыятывы Народнага антыкрызіснага ўпраўлення выказаць салідарнасць з беларусамі, якія змагаюцца за свабоду сваёй Радзімы, і адкрыць сквер Вольнай Беларусі ў Беластоку. Жыве Беларусь!» — пракаментаваў дадзеную падзею Павел Латушка.
Сквер Вольнай Беларусі — сімвалічны жэст ад гарадскіх улад Беластока з перайменаваннем часткі вуліцы, дзе знаходзіцца беларускае консульства, увасобіўся ў шыльду з новай назвай. Цяпер беларускае консульства афіцыйна знаходзіцца ў скверы Вольнай Беларусі. Тут, перад беларускім консульствам, кожныя выхадныя збіраюцца беларусы, якія пратэстуюць супраць рэжыму Лукашэнкі і падтрымліваюць Украіну ў поўнамаштабнай вайне, што развязала Расія.
