Жыхарка ўкраінскага Чарнігава Наталля Захаранка паехала да сястры ў Мазыр праз Польшчу і не адгукаецца. Пра гэта стала вядома «Радыё Свабода».
«З ёй няма сувязі прынамсі з 17 ліпеня. Тэлефоны — беларускі і ўкраінскі — не адказваюць. Да гэтага часу яна рэгулярна ездзіла ў Беларусь праз Польшчу», — паведаміў адзін са знаёмых жанчыны.
Па словах суразмоўцы, да 2021 года Натальля Захаранка рэгулярна ездзіла ў Беларусь.
Вядома таксама, што з 2022 года яна брала па дарозе перадачы, дакументы. Дапамагала перасякаць мяжу іншым людзям — з Украіны праз Польшчу ў Беларусь і назад. У тэматычных чатах перавозак яна пакінула шмат аб’яваў. Людзі актыўна карысталіся яе паслугамі.
Адна з апошніх аб’яваў Натальлі ў адмысловым чаце — пра тое, што 10 ліпеня яна едзе з Чарнігава ў Мазыр праз Луцк, Роўна, Жытомір, польскія гарады і Брэст. Яна прапаноўвала ўзяць пасажыраў, перадачы, пасылкі, дакументы, катоў і сабак. Назад украінка збіралася ехаць 21 ліпеня. І прапала.
Таксама, паводле паведамленняў у чаце, Наталля абяцала забраць пасажыраў з Беларусі ва Украіну, чаго таксама не адбылося.
Сваякі жанчыны, якія жывуць у Чарнігаве, восем дзён не маюць аніякай інфармацыі пра яе месцазнаходжанне.
Родныя жанчыны дапускаюць, што яе маглі затрымаць сілавікі, якіх зацікавілі яе частыя паездкі з Чарнігава ў Мазыр. У Мазырскім ІЧУ і Гомельскім СІЗА на пытанні «Радыё Свабода» пра магчымы арышт украінкі адказваць адмовіліся.