Беларуская дыяспара Беластока запрашае прыняць удзел у маршы салідарнасці з нагоды трэцяй гадавіны прэзідэнцкіх выбараў у Беларусі. Ён пройдзе 6 жніўня па цэнтры Беластока.
У акцыі запрашаюць паўдзельнічаць усіх ахвотных. Мерапрыемства адбудзецца з нагоды трэцяй гадавіны прэзідэнцкіх выбараў у Беларусі, якія беларускія «ўлады» сфальсіфікавалі, а пасля пачаліся буйныя палітычныя рэпрэсіі супраць беларусаў.
Марш пачнецца ў 16:00 6 жніўня ад помніка Пілсудскаму на плошчы Касцюшкі. Скончыцца акцыяй ля консульства Беларусі.
Арганізатары лічаць, што на марш годнасці трэба ісці, каб паказаць усяму свету і беларусам унутры краіны, што старонка не перагорнутая і барацьба супраць дыктатуры Лукашэнкі працягваецца. У маршы заклікаюць паўдзельнічаць усіх ахвотных, апранацца ў адзенне колераў нацыянальнага сцяга, вышыванкі і цішоткі.
«Дзень 9 жніўня 2020 года падзяліў жыццё беларусаў на перад і пасля. Так, як раней, ужо не можа быць і не будзе. Немагчыма забыцца на гвалт, забойствы, катаванні, рэпрэсіі, тысячы палітвязняў, але таксама немагчыма забыцца на мацнейшы народны ўздым, дваровыя канцэрты, узаемадапамогу і салідарнасць.
Тры гады, якія мінулі з дня выбараў, навучылі нас шмат чаму, і адзін з галоўных урокаў можна акрэсліць радком са знакамітай песні Nizkiz: “Каму мы патрэбныя, калі не сабе”. Наша краіна — наша справа, яе свабода — наша задача, памятаць усё, рабіць што можна і імкнуцца да справядлівасці — наш абавязак», — гаворыцца ў закліку дыяспары.
