Еўрасаюз выпусціў заяву з нагоды трэцяй гадавіны сфальсіфікаваных прэзідэнцкіх выбараў у Беларусі. «У гэты дзень тры гады таму сотні тысяч беларусаў выйшлі на вуліцы, каб мірна абараніць сваё права на выбар уласнай будучыні. Гэтыя спантанныя дэманстрацыі былі з надзвычайнай жорсткасцю падаўлены рэжымам Лукашэнкі», — адзначаецца ў заяве Высокага прадстаўніка ад імя ЕС.
Ён сцвярджае, што сёння, праз тры гады, для тых, хто адважваецца выказваць любую крытыку сістэмы, сітуацыя горшая, чым калі-небудзь раней. «Мы глыбока занепакоены станам правоў чалавека ў Беларусі. У цяперашні час каля 1500 палітычных зняволеных утрымліваюцца ў жахлівых умовах, падвяргаюцца жорсткаму абыходжанню і катаванням, не маючы доступу да базавых медыцынскіх паслуг. Многія з гэтых зняволеных на працягу месяцаў пазбаўлены сувязі са сваімі адвакатамі і сваякамі, якія не ведаюць аб іх цяперашнім месцазнаходжанні і стане здароўя» — канстатует прадстаўнік ЕС.
У ЕС лічаць, што «рэжым Лукашэнкі таксама стаў пагрозай рэгіянальнай і міжнароднай бяспецы з-за такіх дзеянняў, як прымусовая пасадка грамадзянскага самалёта ў маі 2021 года і выкарыстанне нерэгулярнай міграцыі на ўсходніх межах ЕС у якасці інструменту. З 24 лютага 2022 года рэжым стаў саўдзельнікам агрэсіўнай вайны Расіі супраць Украіны, паставіўшы пад пагрозу ўласны суверэнітэт і незалежнасць Беларусі, каб падтрымліваць злачынствы Расіі ва Украіне».
Акрамя таго, ЕС узгадвае магчымасць Расіі незаконна дэпартаваць украінскіх дзяцей на беларускую тэрыторыю, размяшчэнне ў Беларусі наймітаў «Вагнер».
У адказ ЕС будзе працягваць ціснуць на беларускі рэжым «так доўга, як гэта спатрэбіцца». У заяве узгадваюццы нядаўнія санкцыі супраць прадстаўнікоў рэжыму.
«ЕС высока ацэньвае і падтрымлівае намаганні беларускага дэмакратычнага руху. Рашучасць беларускага народа, які з высокай рызыкай для сябе працягвае адстойваць дэмакратыю, з’яўляецца фактарам, які ўсяляе вялікую надзею. ЕС аказвае падтрымку ахвярам рэпрэсій, праваабаронцам, арганізацыям грамадзянскай супольнасці, незалежным СМІ і журналістам, студэнтам і кампаніям у выгнанні, а таксама ініцыятывам, накіраваным на захаванне беларускай ідэнтычнасці, культуры і мовы», — заявіў ЕС.
Ён заклікаў улады Беларусі «ўступіць у сапраўдны і інклюзіўны дыялог з усімі слаямі грамадства, які б вёў да свабодных і справядлівых выбараў». Пры гэтым ЕС абавязваецца дапамагчы Беларусі стабілізаваць сваю эканоміку і рэфармаваць свае інстытуты, калі яна стане на шлях пераходу да дэмакратыі.
«Наша мэта – садзейнічаць павышэнню ўстойлівасці і ажыццяўленню новых дэмакратычных рэформ, ствараць новыя працоўныя месцы і павышаць узровень жыцця людзей, у тым ліку праз Усеабдымны план эканамічнай падтрымкі дэмакратычнай Беларусі з бюджэтам да 3 млрд еўра», — сцвярджаецца ў дакуменце.
