Міністр замежных спраў Польшчы Збігнеў Раў звярнуўся да беларусаў з нагоды трэцяй гадавіны фальсіфікаваных прэзідэнцкіх выбараў.
«Сотні тысяч з вас пакінулі радзіму. Вы збеглі ад рэпрэсій і бесперспектыўнасці. Для бальшыні гэтай маштабнай эміграцыі Польшча стала бяспечным прыстанішчам. У нашай краіне, вы можаце развіваць свае таленты і прадпрымальніцтва. Мы ведаем, што многія з вас мараць аб хуткім вяртанні дадому. На жаль, спіраль гвалту не спыняецца. Вашы суайчыннікі ў краіне падвяргаюцца бязлітаснай прапагандзе. Аднак я перакананы, што ў будучым вольная краіна вас прыме, каб мець магчымасць поўнага і сапраўднага росквіту», — прыводзіць яго словы Польскае радыё.
Кіраўнік МЗС дадаў, што Польшча паважае імкненне беларускага грамадства захоўваць уласную нацыянальную ідэнтычнасць.
«Культывуючы беларускую ідэнтычнасць, вы выяўляеце, што з’яўляецеся часткай еўрапейскай сямʼі. Польшча падтрымлівае вашы нацыянальныя надзеі і еўрапейскія памкненні», – сказаў Збігнеў Раў.
