Героі анімэ, дэманы, тэлепузікі, робаты, самураі — усе гэтыя і мноства іншых вобразаў давялося сустрэць на фестывалі японскай культуры Moricon 2023, які адбыўся з 8 па 10 верасня ў Беластоку. Ён прапаноўваў звыш за 120 мерапрыемстваў — ад гульняў у маджонг да караоке, лекцый і майстар-класаў.
Як паведамляюць арганізатары, імпрэзу наведала каля 1 800 фанатаў. Сярод іх — і журналісты MOST.
Што такое Moricon 2023?
Мэта фестывалю — пашырэнне ведаў пра японскую культуру і анімацыю. Аўдыторыя — фанаты анімэ, мангі і культуры Азіі, але таксама і фантастыкі, настольных і кампутарных гульняў.
Мерапрыемства закрытае і платнае — каб наведаць яго, трэба было набыць квіток (на адзін дзень ці на ўсе тры). Ніякіх абмежаванняў па ўзросце не было, але ўдзельнікі да 18 гадоў мусілі мець падпісаны дазвол ад бацькоў або апекуноў, а да 12 — маглі прыйсці толькі з імі разам.
З забаронаў — ужыванне алкаголю на тэрыторыі палітэхнікі. Да таго ж удзельнікаў папярэджвалі, што ў нецвярозым стане ўваход забаронены.
Kurde, co sie dzieje?!
Галоўнымі падзеямі канвенту сталі конкурс касплэю (кожны з удзельнікаў не проста паказваў касцюм, але і распавядаў гісторыю персанажа) і выступы ідал-гуртоў Honeyed Idols і Milky Way Heroes, якія спецыялізуюцца на стварэнні кавераў відэакліпаў у рытме k-popu. Дарэчы, ідал-гурты — гэта адна са з’яў японскай поп-культуры. Звычайна яны складаюцца з маладых дзяўчат, якія спяваюць і танчаць.
Кіроўца таксі, які падвозіць нас да месца дзеяння, раптам вымаўляе: «Kurde, co sie dzieje?!» («Чорт, што адбываецца?!»). Ён выглядае здзіўленым і ўзрушаным, гледзячы на натоўп удзельнікаў, які арганізавана ідзе на канцэрт ідал-гурту Honeyed: большасць — у касцюмах ці вобразах.
На ўваходзе ў асноўны будынак збіраецца чарга з такіх персанажаў. То тут, то там хтосьці вітаецца і прапаноўвае сфоткацца разам.
На кожную гадзіну — да 12 розных актыўнасцяў
Уваходзім у партэр Цэнтра сучаснай адукацыі. Тут размясціліся маркет, стэнды кірмашу, фудкорт, прастора «Аула», дзе праходзяць конкурсы і лекцыі; «Мастацкі куток» з выставай арыгамі і заняткамі па маляванні, а таксама «Чытальня» — зона настольных гульняў і гульні ў мафію. Наведвальнікі абсалютна ўключаныя ў тое, што адбываецца на лекцыях, у гульнях і конкурсах — гэта сапраўды захапляе.
Падымаемся на другі паверх. Тут зоны хэндмэйд-кірмашу, адпачынку і забаў. Дарэчы, і фудкорт, і кірмашы — цалкам у тэматыцы азіяцкай культуры. На фудкорце можна купіць цукеркі і батончыкі з норы і супер-вострай лапшы. На кірмашы — кнігі, часопісы, плакаты, фігуркі, упрыгожванні, аксэсуары, мноства дробных вырабаў: налепак, малюнкаў, паштовак, цацак.
Для навігацыі можна спампаваць на тэлефон праграму Konwencik (дарэчы, гэта адначасова і гайд па актуальных і будучых падобных фестывалях у Польшчы). Зручна: можна не толькі адзначыць пункты з праграмы, на якія хочацца патрапіць, але і зарыентавацца, дзе менавіта мерапрыемства будзе праходзіць. А выбіраць складана, бо на кожную гадзіну прыходзіцца да 12 розных актыўнасцяў.
Непадалёк ад гэтага будынка — Goblin Arena. Пад адкрытым небам ахвотныя сыходзяцца ў імправізаваных бітвах і дуэлях. Зброя самая розная, але бяспечная — з мяккіх матэрыялаў, аблепленых скотчам.
«Агульная справа так аб’ядноўвае людзей»
Заўважаем, што вакол у асноўным моладзь. Мяркуючы па размовах, многія прыехалі з іншых гарадоў Польшчы: такія фестывалі — гэта цудоўны спосаб апынуцца ў коле «сваіх». Рознакаляровыя валасы, вушкі, хвасты, яскравыя макіяжы, смелыя касцюмы і абсалютная адкрытасць — шмат хто ходзіць з шыльдачкамі Free Hugs (бясплатныя абдымкі), абменьваецца кантактамі і наўпрост знаёміцца. Сярод удзельнікаў ёсць і беларусы.
Дыяна — адна з валанцёрак фестывалю. Яна родам са Слоніма, але палову жыцця жыве ў Польшчы і зараз вучыцца ва ўніверсітэце ў Беластоку. Да Maricona далучылася па запрашэнні аднагрупніцы.
— Я не зусім у тэме аніме, але чаму б і не? У такіх фестывалях раней не ўдзельнічала. Але ў нас пры школе ад Цэнтра дадатковай адукацыі быў гурток, мы праводзілі канцэрты бардаўскіх песень, таму я пастаянна ў чымсьці такім.
Пытаемся: ці моцна адрозніваюцца беларусы ад палякаў па адкрытасці і самавыражэнні?
— Мне здаецца, тут справа не столькі ў нацыянальнасці, колькі ў тым, што ўсіх аб’ядноўвае агульны інтарэс — да анімэ, касплэю. Для мяне гэта ўсё новае, але я захапляюся тым, што агульная справа так аб’ядноўвае людзей. У мяне проста душа радуецца. Я ўпэўненая, што калі б штосьці падобнае рабілі і беларусы, то яно было б не горшым. Мне здаецца, мы таксама здольныя на такое, проста ў нас няма такіх магчымасцяў арганізацыі.
Дыяна думае, што у наступным годзе, магчыма, таксама пастараецца прыдумаць нейкі касцюм.
Спаткаем яшчэ дзвюх дзяўчат з Беларусі, яны вучацца ў адной са школ Беластока. На фестываль патрапілі амаль выпадкова — мама адной убачыла абвестку пра імпрэзу ў інтэрнэце літаральна за дзень да яе. Дзяўчаты цікавяцца анімэ-культурай: з улюбёных называюць мангу «Свет, які кіруецца катамі», анімэ «Намбака», «Сэйлармун» і «Магістр д’ябальскага культу».
Што калі не ведаў пра Moricon
Патрапіць на Moricon варта хаця б для таго, каб уразіцца атмасферай і арганізацыяй. Свабода самавыражэння сапраўды захапляе.
Наступны Moricon адбудзецца ў верасні 2024 года, дакладныя даты абвесцяць пазней. За імі можна сачыць на сайце moricon.pl.
Падобныя канвенты ў Польшчы адбываюцца рэгулярна. Напрыклад, у бліжэйшыя месяцы адбудуцца фестывалі Copernicon 2023 (касмічная тэматыка), Festiwal Fantastyki Opolcon 2023 (фантастыка і фэнтэзі), Tsukimi 2023 (японская культура). Акрамя вышэй узгаданай праграмы konwencik, сачыць за імі можна на сайце konwenty.info.
