Кірыл Гняздзілаў з 2007 года служыў у міліцыі, а ў жніўні 2020 года звольніўся і перайшоў у IT. У 2022 годзе мужчына з’ехаў у Польшчу, але, пражыўшы паўгода, вярнуўся ў Беларусь, каб наведаць жонку і дзіця. Яго затрымалі на мяжы. Яго гісторыю распавёў праваабарончы цэнтр «Вясна».
Пра крымінальную справу Гняздзілава вядома няшмат: суд праходзіў у закрытым рэжыме. Вядома толькі, што яна была звязаная з «Чорнай кнігай Беларусі». За гэта выставілі два крымінальныя артыкулы: садзейнічанне распальванню варожасці (ч.6 арт. 16 і ч. 1 арт. 130 КК) і незаконныя дзеянні ў дачыненні да інфармацыі аб прыватным жыцці (ч. 3 203-1 КК).
Брэсцкі абласны суд асудзіў экс-міліцыянта на восем гадоў калоніі ўзмоцненага рэжыму. Таксама ён павінен выплаціць двум пацярпелым маральную кампенсацыю ў памеры 2000 і 1000 рублёў.
