Пасля трохгадовага перапынку беларускі гурт Dzieciuki вяртаецца ў Беласток. 7 кастрычніка разам з польскім гуртом De Lindows беларусы выступяць у беластоцкім бары 6-Ścian.
За сваю гісторыю Dzieciuki выступалі ў Беластоку тры разы. Апошні раз быў у верасні 2020 года.
— Тады пасля Беластока ў нас яшчэ быў канцэрт на наступны дзень у Варшаве. Гэта быў такі кароткі перыяд, калі трошкі аслабілі польскія ўлады каранцін, і можна было прарвацца на выступ. Радэк Пусько, Павал Станеўскі тады прабівалі ў польскіх уладаў адмысловую паперу, каб нас прапусцілі праз мяжу на гэтыя два канцэрты. Тады ўсё атрымалася, — распавядае лідэр гурту Алесь Дзянісаў.
7 кастрычніка ў Беластоку беларусы будуць выступаць разам з польскім гуртом De Lindows.
— Вельмі прыемна будзе сустрэцца з беларусамі Падляшша. Таксама ў нас ёсць і польскія сябры, якія прыйдуць абавязкова на канцэрт. А выступаць у Беластоку мы будзем з адным сяброўскім польскім гуртом — De Lindows. Іх таксама варта паслухаць. Так што ўсіх запрашаем. Але калі браць агулам, то гэта вялікі шанец сустрэцца з гарадзенцамі з нашага мінулага жыцця.
Калі: 7 кастрычніка
Дзе: 6-Ścian (Warszawska 34)
Час: з 18:00 да 22:00
Квіткі: 45-55 Pln
