25 верасня MOST зрабіў матэрыял пра IT-прадпрымальніка Максіма, вядомага таксама як блогер Злы Дальнабой. Ён распрацаваў аплікацыю «AntiBAG Тахограф» для кіроўцаў-дальнабойнікаў. А нядаўна зрабіў яе беларускамоўную версію і сам яе агучыў.
Публікацыя была перадрукаваная многімі медыя. Постаць прадпрымальніка зацікавіла журналістаў. 1 кастрычніка на «Белсаце» выйшла расследаванне пра дзейнасць Максіма Кузняцова, у якім яго звязалі з працай на беларускіх сілавікоў.
Пасля выхаду тэксту з каналам «Белсат» звязаўся чытач, які даслаў інфармацыю пра тое, што Максім Кузняцоў з’яўляўся сакрэтным супрацоўнікам 9-га ўпраўлення ГУБАЗіК па Гродзенскай вобласці. Там сцвярджалася, что ягоная праца — сачэнне за прыхільнікамі пераменаў, праслухоўванне іх тэлефонаў і іншыя формы сачэння і кантролю за іншадумцамі.
«Белсат» правёў расследаванне. З яго вынікае, што Кузняцоў ужо некалькі гадоў жыве ў Польшчы. У Варшаве ён стварыў Лічбавы прафсаюз кіроўцаў, які мае ўласны фонд і дапамагае дальнабойнікам, якія трапілі ў непрыемнасці. Мясцовыя ўлады да Кузняцова прэтэнзій не мелі.
Але ў Беларусі, па дадзеных канала, ён працаваў у дзяржаўнай праектнай установе «Ларіскор», праз якую, па дадзеных BYPOL, працавала міліцэйская агентура. Як супрацоўнік гэтай арганізацыі ён рабіў выплаты ў Фонд сацыяльнай абароны насельніцтва. А апрача таго, па дадзеных кіберпартызанаў, меў некалькі пашпартоў на розныя прозвішчы. Тры з іх былі выдадзеныя ў адзін дзень.
Кузняцоў адмаўляе, што меў альбо мае якія-небудзь сувязі з ГУБАЗіК, а інфармацыю пра працу ў «Ларіскор» называе трызненнем. «Гэта чарнуха, замануха звычайная», — пракаментаваў ён вынікі расследавання, дадаўшы што таую таблічку Excel, як прыведзеная ў расследаванні (пра супрацоўнікаў «Ларіскор»), можа стварыць хто заўгодна.
Адключаная картка
У свой час інфармацыя пра ўсіх супрацоўнікаў «Ларіскор» трапіла да спецыяльных баз дадзеных, у тым ліку на Чорную мапу Беларусі. Але некалькі чалавек з ліберальных колаў прасілі выдаліць Кузняцова з базы, спасылаючыся на тое, што ён свой. Тады картку адключылі, хаця з сістэмы не выдалілі.
Сапраўды, у 2020 годзе Максім удзельнічаў у пратэстах, а яго будучая (на той момант) жонка звольнілася з аднаго з сілавых ведамстваў, паколькі была нязгодная з тым, што адбываецца. Як сцвярджае сам Кузняцоў, пасля выклікаў у міліцыю і пагроз у сувязі з удзелам у пратэстах сям’я вырашыла канчаткова пакінуць Беларусь.
Зараз, пасля скандалу, картку Кузняцова зноў уключылі. Яго зноў можна знайсці на Чорнай мапе.
Адным з тых, хто прасіў выдаліць інфармацыю пра Кузняцова, быў Аляксандр Азараў. На той момант ён узначальваў BYPOL і з’яўляўся прадстаўніком Аб’яднанага пераходнага кабінета. Тады Кузняцоў публікаваў ролікі, якія кампраметуюць Азарава.
— Мы з ім заключылі пагадненне: ён выдаляе гэтыя непраўдзівыя ролікі… А я са свайго боку папрашу кіберпартызанаў, каб яны маглі выдаліць яго. Ён з’ехаў з Беларусі яшчэ да падзей 2020 года. Мы звярталіся да некаторых людзей, якія ведаюць яго асабіста. І яны яго ахарактарызавалі толькі з лепшага боку, — сказаў Азараў «Белсату».
Спрэчка з-за кватэры
Па інфармацыі «Белсата», магчымасці для вярбоўкі Кузняцова ў ГУБАЗіК былі. У рэпартажы са спасылкай на ананімныя крыніцы сцвярджаецца, што супраць Кузняцова была заведзеная крымінальная справа за махлярства.
З гэтай інфармацыі Кузняцоў смяецца. Ён кажа, што купіў кватэру у Гродна, у тым жа доме, у якім жыў — на вул. Сацыялістычнай. Але родныя прадаўца абурыліся, што здзелка была заключаная па цане ніжэйшай за рынкавую і пайшлі ў Следчы камітэт і пракуратуру. Але справа была закрытая «за адсутнасцю падзеі злачынства». Цана пакупкі была нават вышэйшай за тую, па якой ён пасля прадаў кватэру.
Таксама Кузняцоў абвяргае, што ведаў чалавека, які ў сюжэце «Белсата» названы яго куратарам, і тое, што яны разам ездзілі за мяжу.
