1 студзеня 2024 года ў Беластоку пачне працаваць Цэнтр беларускай культуры. Пра гэта на прэс-канферэнцыі 16 лістапада распавёў маршалак Падляскага ваяводства Артур Касіцкі.
Сродкі на працу цэнтра прадугледжаныя ў рэзерве праекта ваяводскага бюджэту. 1,5 млн злотых плануецца накіраваць на функцыянаванне ўстановы і яшчэ 1,5 млн злотых — на падрыхтоўку аднаго з будынкаў, у якім размесціцца цэнтр. Ад пачатку наступнага года цэнтр пачне працаваць у будынку па вул. Kilińskiego, а па меры гатоўнасці асноўнага аб’екта пераедзе туды на працягу года.
Праект яшчэ не зацверджаны, але папярэднія кансультацыі паказалі, што асноўныя камітэты не супраць.
Цэнтр будзе інтэграваць 12 беларускіх арганізацый, у тым ліку дыяспары, якія дзейнічаюць на Падляшшы, распавёў прафесар, прадстаўнік беларускай нацыянальнай меншасці ў Беластоку Алег Латышонак. Ён выказаў надзею, што цэнтр дазволіць інтэграваць у тым ліку так званую «новую дыяспару», якая сфармавалася пасля 2020 года.
Узначаліць цэнтр Анатоль Вап. Ён бачыць асноўную задачу ўстановы ў развіцці беларускай культуры праз арганізацыю канцэртаў, сустрэч, канферэнцый, правядзенне гістарычных даследаванняў, але таксама і ў папулярызацыі беларускай мовы сярод моладзі. У гэтым кірунку цэнтр плануе працаваць са школамі, у якіх вядзецца вывучэнне беларускай мовы.
Плануецца, што цэнтр будзе працаваць не толькі для жыхароў Беластока, але і супрацоўнічаць з гмінамі і няўрадавымі арганізацыямі розных населеных пунктаў рэгіёну.
