Аўтары сінгла Swada Music і Niczos у супрацы з Падляшскім ваяводствам ствараюць музыку, якая прасякнута традыцыямі памежнага рэгіёну. У рамках праекта #indawoods аўтары выпусцілі тры кліпа. Песні «Trava Murava» і «Na biesiedi» — гэта сумесь фальклорных спеваў і сучаснага тэхна.
Але папулярнасць сярод беларусаў набыла песня «Chadžu ja». Менавіта ў ёй найбольш яскрава адлюстравана мова Падляшша.
У каментарах да кліпу беларусы адзначаюць, што мова вельмі падобная да палесскай гаворкі.
— У мяне так бабця з-пад Пінска размаўляе, я ўвогуле ўсё зразумеў, — адзначае беларус.
Гледачы звяртаюць увагу і на цікавую моўную сувязь.
— Вельмі незвычайна гучыць на беларускае вуха, але безумоўна падабаецца, — піша ў каментарах адзін са слухачоў.
Вакалістка групы Ніка Юрчук у сваім фэйсбуку распавяла, што працэс стварэння быў цікавым і працаёмкім, паколькі кліп з усім вакалам быў запісаны за адзін дубль.
Больш за ўсё мова Падляшша распаўсюджаная на паўночнай тэрыторыі рэігіёну. Мясцовыя жыхары называюць гэтыя дыялекты «сваёй» ці тутэйшай мовай. Зараз ужо амаль не засталося людзей, для якіх падляшская мова — першая. У асноўным на дыялекце размаўляюць энтузіясты і тыя, хто асэнсавана зрабіў такі выбар.
