12 студзеня ў польскі пракат выходзіць фільм «Паўстанец» пра падзеі 1863-1864 гадоў. Гэта першы ў Польшчы фільм пра Студзеньскае паўстанне больш чым за 30 гадоў. Прэм’ера адбылася 9 студзеня ў Варшаве.
Цэнтральная фігура фільма — святар Станіслаў Бжуска. 22 студзеня 1863 года, у дзень пачатку паўстання, ён узначальвае падраздзяленне, якое паспяхова атакуе расійскі гарнізон. Святара прызначаюць галоўным капеланам. Ён яшчэ доўга застаецца няўлоўным для расійскіх войскаў.
У фільме прасочваецца сувязь гістарычных падзей: дзеянне пачынаецца перад Варшаўскай бітвай 1920 года. Адзін з персанажаў аказваецца ўдзельнікам паўстання 1863 года і ўспамінае тыя падзеі.
«Ідэя нарадзілася ў снежні 2020 года. Праглядаючы архіўныя крыніцы пра польскіх герояў дзевятнаццатага стагоддзя, я выявіў постаць айца Бжускі і прыйшоў да высновы, што гэта тэма фільма», — тлумачыў рэжысёр Тадэвуш Сыка.
Ён таксама адзначаў, што фільм будзе спрыяць таму, каб фарміраваць свядомасць у маладога пакалення.
