Засвоіць асновы журналістыкі, даведацца, як працуюць медыі, паспрабаваць сябе ў навінах, інтэрв’ю і рэпартажы, атрымаць базу для працы з фота і відэа — усё гэта можна зрабіць у межах навучальнага курса Медыяшколы 2.0 у Беластоку.
Больш за два месяцы штотыдзень навучэнцы будуць сустракацца з дасведчанымі журналістамі незалежных беларускіх выданняў. Заняткі будуць праходзіць офлайн у нефармальнай і прыязнай атмасферы. А галоўнае — яны будуць практыкаарыентаванымі! У праграме: трэнінгі, воркшопы, хатнія заданні, а таксама магчымасць цягам навучання публікавацца ў беларускіх медыях і атрымліваць зваротную сувязь ад дасведчаных калег.
Вы даведаецеся, як знайсці тэму і рэалізаваць яе ў розных жанрах і фарматах, як прапанаваць тэму рэдактару, як знайсці крыніцы і герояў ды правільна працаваць з імі, як правесці фактчэкінг і не распаўсюдзіць фэйк. Веды, атрыманыя на курсе, дазволяць вам пачаць працу ў журналістыцы або павысіць якасць уласнага медыяпраекта.
Удзельнікаў курса чакае таксама экскурсія ў сапраўдную рэдакцыю аднаго з мясцовых выданняў. А тых, хто паспяхова скончыць навучанне — выпускны і сертыфікаты!
Летась такая школа ўжо праходзіла ў Беластоку — і яе выпускнікі знайшлі працу ў медыях: і не толькі журналістамі, але і рэкламшчыкамі ды спецыялістамі па сацыяльных сетках.
Як стаць нашым навучэнцам?
Каб патрапіць на курс, калі ласка, запоўніце анкету да 27 студзеня.
Што яшчэ трэба? Толькі ваша жаданне і трошкі вольнага часу штотыдзень. Навучанне бясплатнае.
Курс пачнецца ў лютым 2024 года. Заняткі будуць адбывацца раз на тыдзень у MediaPortBelarus у Беластоку (ul. Sienkiewicza, 44), працягласць — 1,5-2 гадзіны.
