МЗС Польшчы адрэагавала на чарговую хвалю масавых ператрусаў і затрыманняў былых палітвязняў і іх сваякоў у Беларусі, якая пракацілася па краіне 24 студзеня.
«Сітуацыя з правамі чалавека ў Беларусі становіцца ўсё больш драматычнай. Ціск рэжыму Лукашэнкі на грамадзянскую супольнасць і палітычных апанентаў, які ўзмацняецца ў апошнія тыдні, мае на мэце запалохванне беларусаў — прымус іх да маўчання або выезду з краіны», — сцвярджаецца ў заяве МЗС.
У МЗС нагадалі, што пасля сфальсіфікаваных прэзідэнцкіх выбараў у 2020 годзе тысячы людзей былі заключаныя ў турму, і не менш за 1400 палітычных зняволеных усё яшчэ застаюцца ў турмах.
«Умовы ўтрымання праціўнікаў рэжыму абражаюць чалавечую годнасць — апазіцыянеры адбываюць пакаранне ў перапоўненых халодных камерах, з абмежаваным доступам да медыцынскай дапамогі і абмежаваным кантактам з блізкімі», — падкрэслілі ў міністэрстве.
У сацсетцы Х МЗС заклікала прыняць новы пакет санкцый супраць Беларусі.
Днём раней беларускія актывісты правялі пікет ля будынка міністэрства ў Варшаве з просьбай заняць больш рашучую пазіцыю ў дачыненні да рэжыму Лукашэнкі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
