Аб’яднаны пераходны кабінет прапанаваў прыняць «праваабарончы» пакет санкцый на ўсе тавары, якія вырабляюцца ў пенітэнцыярных установах Беларусі. Пра гэта намеснік кіраўніцы кабінета Павел Латушка паведаміў у інтэрв’ю польскаму агенцтву PAP.
У гэтым пытанні дэмсілы разлічваюць на намаганні польскага ўрада і ўжо прасоўваюць гэтую прапанову ў Радзе ЕС.
Абгрунтоўваючы гэтыя меры, Павел Латушка адзначыў, што «палітзняволеных незаконна трымаюць у турмах і калоніях, дзе іх не толькі катуюць і паміж катаваннямі змяшчаюць у карцэр, але і прымушаюць да цяжкай працы. За яе палітзняволеныя атрымліваюць ад трох цэнтаў да 1,5 долараў у месяц. У той жа час даходы беларускага турэмна-індустрыяльнага канвеера вельмі значныя — сотні мільёнаў долараў за год: у асноўным гэта дрэва- і металаапрацоўка, вытворчасць адзення і абутку, сельскагаспадарчай прадукцыі. Усё гэта пастаўляецца больш чым у 20 краін свету — і можа паступаць на рынкі ЕС».
Акрамя таго, ён звярнуў увагу, што неабходныя аднастайныя сродкі кантролю за выкананнем санкцый ЕС.
Нагадаем, 25 студзеня МЗС Польшчы адрэагавала на чарговую хвалю масавых ператрусаў і затрыманняў былых палітвязняў і іх сваякоў у Беларусі і заклікала прыняць новы пакет санкцый супраць Беларусі.
Не забудзь падпісацца на MOST ў Тэлеграм. Мы галоўнае медыя беларусаў у Польшчы.
