Беларуская дыяспара Кракава здолела за ўласны кошт праз аўкцыён атрымаць у арэнду памяшканне для правядзення разнастайных мерапрыемстваў. Цяпер яна збірае грошы на яго ўладкаванне і ўстойлівую працу новай беларускай прасторы. Пра планы і вынікі працы камунікацыйны менеджар мясцовай дыяспары Глеб Ляпейка распавёў «Радыё Ўнэт».
Раней беларуская дыяспара здымала памяшканне сумесна з польскай некамерцыйнай арганізацыяй. Але гэта накладала пэўныя абмежаванні: беларусы не маглі праводзіць мерапрыемствы, калі хацелі: трэба было ўлічваць інтарэсы суарандатараў. Таму чакалі магчымасці і рэсурсаў для стварэння сваёй асобнай прасторы.
Памяшканне знаходзіцца ў цэнтры Кракава, на вул. Mikołajska за Марыяцкім касцёлам.
На старонцы збору сродкаў паведамляецца, што гэта памяшканне плошчай 102 кв. м., у якім ёсць адзін вялікі пакой на 51 кв. м., два маленькія і доўгі калідор паміж імі, а таксама туалет.
Атрымаць яго праз аўкцыён было проста: больш прэтэндэнтаў на яго не было. Цяпер у дыяспары ёсць прастора, якую можна выкарыстоўваць 24/7, але ёсць жаданне запрашаць да сябе і іншыя дыяспары, і палякаў.
Зараз памяшканне трэба ўладкаваць, на гэта збіраюць сродкі. Збор будзе працягвацца тры месяцы. 41 тыс. злотых пойдзе на пераезд, абсталяванне і першыя тры месяцы існавання прасторы, каб «стаць на ногі» і знайсці іншыя крыніцы фінансавання.
Пакуль цалкам існаваць за кошт данатаў у дыяспары няма магчымасці, але за сабраныя грошы двойчы аплачвалася арэнда памяшкання і камунальныя паслугі. Ніякіх грантаў ці нейкай іншай падтрымкі на прастору яшчэ не было, але ў дыяспары ёсць надзея, што будзе.
Таксама некаторыя бюджэты мерапрыемстваў былі цалкам пакрыты за кошт данатаў, а штогадовы пікнік «Летуцень» — на 40%. Але гэта буйное мерапрыемства, на яго прыехала да 4 тыс. чалавек, прычым не толькі кракаўскія беларусы.
Не забудзь падпісацца на MOST ў Тэлеграм. Мы галоўнае медыя беларусаў у Польшчы.
