Жыхары польскай Гайнаўкі — аднаго з цэнтраў беларускай нацыянальнай меншасці, размешчанага ля Белавежскай пушчы — пачалі збіраць подпісы за правядзенне рэферэндуму адносна лёсу пушчы. Гэтым яны хочуць супрацьстаяць комплексу мер, распрацаваных урадам для абароны запаведніка.
У лютым у Сенаце прадставілі комплекс мер аб абароне Белавежскай пушчы. Прапанаваны закон узмацняе кантроль за дзейнасцю людзей на тэрыторыі амаль 60 тыс. га. Сярод іншых мер, накіраваных на ахову запаведніка, дакумент прадугледжвае ліквідацыю трох лясніцтваў: у Белавежы, Гайнаўцы і Броўску — і забарону на вядзенне лясной гаспадаркі і палявання на гэтых тэрыторыях.
У Падляскім ваяводстве выступілі супраць такіх захадаў. Людзі, занятыя ў лясной гаспадарцы, баяцца не толькі страціць крыніцу даходу, але і пазбавіцца службовага жылля. Яшчэ ў лютым жыхары выйшлі на пратэст супраць прапанаваных мер, а таксама ініцыявалі правядзенне мясцовага рэферэндуму. Для яго арганізацыі трэба сабраць не менш за 3500 подпісаў.
Як паведамляе газета Współczesna, за адзін дзень, 13 сакавіка, арганізатарам удалося сабраць 2503 подпісы жыхароў рэгіёну. Яны накіраваныя ў канцылярыю прэзідэнта Анджэя Дуды.
Рэферэндум падтрымліваюць улады ваяводства, у тым ліку маршалак Артур Касіцкі.
— Не ўяўляю сабе, каб нехта па-за нашым рэгіёнам мог вырашаць, як развівацца пушчы, — сказаў ён.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
