25-гадовы Себасцьян Каліноўскі — грамадзянін Беларусі польскага паходжання. У яго ёсць карта паляка, ён ужо сем гадоў жыве ў Польшчы і на падставе прыналежнасці да пальскага народа хадайнічае наконт сталага побыту ў гэтай краіне. Але пакуль яму не ўдаецца атрымаць дакумент. Беларускай службе Польскага радыё ён распавёў пра свае шматгадовыя намаганні атрымаць права на пражыванне.
Себасцьян атрымаў ступень бакалаўра ў польскім універсітэце і працуе ў польскай кампаніі.
— У мяне ёсць карта паляка, і на гэтай аснове я магу падаваць на карту на пастаяннае жыхарства ў Польшчы. Я ўжо трэці раз падаю дакументы. Першы раз я падаваў праз фірму… — аднак мне адмовілі. Потым я падаўся ў Кракаве. Мой калега рабіў дакументы праз вялікае агенцтва і атрымаў карту праз тры месяцы. Я таксама паехаў у Кракаў.
Супрацоўніца агенцтва сказала Себасцьяну, што з картай паляка і вялікім стажам жыцця ў Польшчы ў яго не будзе ніякіх праблем. Яна зрабіла мужчыне рэгістрацыю, аднак выявілася, што прапісала больш за 100 чалавек па адным адрасе.
— У ваяводскім упраўленні інспектар мне сказала, каб я забіраў дакументы — рашення не будзе, і параіла, што найлепш падацца ў Варшаве. Але ў Варшаве ў ваяводскай управе была такая чарга, што можна было падаць дакументы на карту пастаяннага жыхарства толькі праз тры месяцы. Затым я патрапіў да калегі — уладальніка прадпрыемства, які ўсім сваім супрацоўнікам рабіў дакументы ва Уроцлаве. Сказаў, што там будзе ўсё добра і хутка. Праз месяц будзе год, як я чакаю рашэнне з Уроцлава. Два тыдні таму інспектар папрасіла дапоўніць інфармацыю пра выплату падаткаў, я гэта зрабіў, даслаў таксама працоўны кантракт і прапіску ва Уроцлаве.
Зараз Себасцьян легальна знаходзіцца ў Польшчы, паколькі чакае рашэнне па карце побыту. Але доўгае чаканне расчароўвае мужчыну.
— Я амаль восем гадоў жыву ў Польшчы і ўсё не магу атрымаць карту пастаяннага жыхарства. Апошні раз, калі быў у агенцтве, іх супрацоўнік мне параіў, што калі не атрымліваецца з ПМЖ, то я павінен падаваць на часовае. Як жа гэта?! Я павінен аддаць карту паляка і рабіць карту часовага пражывання? Кожны чужаземец можа прыехаць у Польшчу, будзе жыць адзін год і можа атрымаць дакументы на такой падставе, напрыклад, што працуе. Мне вельмі цяжка і крыўдна. Я нават думаў з’ехаць у іншую краіну і там рабіць дакументы.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
