23-гадовы Дор’ян С., які цяпер пад арыштам у справе аб згвалтаванні і забойстве беларускі Лізаветы, прызнаў віну, паведамілі «Белсату» ў Варшаўскай акруговай пракуратуры.
«Падазраваны прызнаўся ва ўчыненні злачынства. Аднак што да зместу ягоных тлумачэнняў, я не магу раскрыць больш падрабязна ягонай працэсуальнай пазіцыі з увагі на інтарэсы следства», — сказаў «Белсату» прэс-сакратар Акруговай пракуратуры Варшавы Шыман Банна.
Ён адзначыў, што сабраныя доказы дазваляюць не сумнявацца ў тым, што злачынства здзейсніў менавіта 23-гадовы Дор’ян С. Хлопец застаецца пад вартаю, арышт санкцыянаваны на прадугледжаныя законам тры месяцы. Калі расследаванне зацягнецца, пракуратура будзе хадайнічаць наконт падаўжэння тэрміну. Пакуль жа следчыя чакаюць вынікі псіхолага-псіхіятрычнай экспертызы, паведаміў спікер пракуратуры:
«Мяркую, гэта пытанне найбліжэйшых дзён або тыдняў, калі мы зможам даведацца хаця б пра папярэднія вынікі экспертызы. Мне цяжка сказаць, гэта ў шмат чым залежыць ад дактароў, ці спатрэбяцца ім дадатковыя даследаванні. Пакуль жа вынікаў не маем, чакаем».
У чым дакладна вінавацяць Дор’яна С.
Спачатку затрыманаму былі прад’яўленыя абвінавачванні ў згвалтаванні і замаху на забойства. У забойстве яго не абвінавачвалі, бо следства не мела доказаў таго, што смерць наступіла ў выніку менавіта дзеянняў злачынцы. Такія доказы з’явіліся пасля анатамавання, і абвінавачванне змянілі. Але, па паведамленнях польскіх медыя, зараз яго абвінавачваюць у забойстве на сэксуальнай глебе і на глебе разбою, а не ў забойстве з асаблівай жорсткасцю.
Нагадаем, на 25-гадовую беларуску напалі ў цэнтры Варшавы раніцай 25 лютага. Злачынец падышоў да ахвяры ззаду і, прыставіўшы нож да горла, уцягнуў яе ў вароты дома па вул. Żurawiа. Там ён згвалціў дзяўчыну, а затым стаў душыць. Пасля здзяйснення злачынства мужчына зрабіў пакупкі ў краме недалёка ад месца злачынства, сеў у трамвай і з’ехаў.
Злачынства трапіла на камеры назірання. Падазраванага затрымалі ўвечары таго ж дня. Пры ім знайшлі нож, якім ён меркавана пагражаў беларусцы.
Пацярпелая дзяўчына перажыла прыпынак сэрца, але медыкам удалося рэанімаваць яе. У крытычным стане яна была дастаўлена ў шпіталь, дзе 1 сакавіка памерла, не прыходзячы ў прытомнасць.
Жорсткае злачынства шакавала Польшчу. Тысячы людзей выйшлі на марш у памяць пра Лізу і выступілі з патрабаваннем узмацніць барацьбу з гвалтам.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
