Былыя палітвязні пераадкрываюць у Варшаве мінскі бар «Банки-Бутылки», піша «Наша Ніва». У Беларусі ён аказаўся пад увагай сілавікоў пасля таго, як у жніўні 2022 года спявачка Мэрыем Герасіменка выканала там песню «Обійми» украінскага гурта «Океан Эльзи». Пасля гэтага яе затрымалі, як і ўладальнікаў бара Андрэя і Марыю Жукоў.
«Мы адраджаем той самы мінскі бар», — напісаў у сваім інстаграме юрыст Ілля Салей, таксама былы палітвязень. Ён стаў адным з партнёраў у справе перазапуску разам з Мэрыем і сям’ёй Жукоў, а таксама іншымі «непублічнымі асобамі».
Новая-старая ўстанова адкрые свае дзверы ўжо ў гэтым месяцы пад шыльдай «Buns&Bottles». Каманда запрашае падпісвацца на іх інстаграм, каб не прапусціць дакладны анонс.
Хто перазапускае праект
Нагадаем, пасля затрымання за выкананне песні спявачку Мэрыем двойчы асудзілі на 15 сутак паводле адміністрацыйнага артыкула. Потым перазатрымалі ў межах крымінальнай справы і змясцілі ў СІЗА.
20 студзеня 2023 года ёй прысудзілі тры гады «хатняй хіміі». А ў студзені 2024 года стала вядома, што «Байсол» эвакуіраваў дзяўчыну з Беларусі.
Андрэй Жук і ягоная жонка Марыя тады таксама атрымалі «хатнюю хімію».
Ілля Салей, будучы адвакатам Марыі Калеснікавай, таксама прайшоў праз турму: яго затрымалі 9 верасня 2020 года. Ён праходзіў падазраваным па ч. 3 арт. 361 Крымінальнага кодэкса (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь). У красавіку 2021 года меру стрымання Салея змянілі з хатняга арышту на заклад. Пазней ён выехаў з Беларусі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
