Тэлевядучая і спявачка Кацярына Ваданосава даказала, што мела права на бясплатнае лячэнне ад анкалагічнага захворвання ў Польшчы. Да гэтага Нацыянальны фонд здароўя (NFZ) выставіў ёй рахунак. Сваю гісторыю Кацярына расказала на старонцы ў Інстаграме.
У 2022 годзе тэлевядучай у Польшчы дыягнаставалі рак грудзей. З таго часу яна прайшла аперацыі, хіміятэрапіі і рэабілітацыю. Увесь гэты час беларуска думала — і нават гаварыла пра гэта ў інтэрв’ю, — што лечыцца бясплатна, бо спачатку чакала міжнароднай аховы, а потым афіцыйна працавала ў Польшчы па ўмове даручэння (umowa zlecenie) і рабіла адлічэнні ў фонд здароўя. Але раптам NFZ выставіў ёй вялікі рахунак.
Сябры прапанавалі Кацярыне дапамагчы грашыма, каб аплаціць лячэнне, але яна вырашыла даказаць сваю правату.
З інфармацыяй пра сацыяльныя адлічэнні, па яе словах, было прасцей, а вось «са страхоўкай у чаканні аховы прыйшлося трошкі папацець».
— Прыйшлося некалькі разоў абіваць парогі цэнтра бежанцаў, шпіталя, уласна NFZ, а яны мяне шпынялі, як мячык футбольны: цэнтр пасуе шпіталю, шпіталь — цэнтру, цэнтр — лагеру бежанцаў, лагер — медцэнтру Petra Medica і г.д. па коле, — распавяла Кацярына.
«І я не буду прадаваць нырку»
Праблему Кацярына звязала з тым, што накіраванне ў шпіталь атрымала першасна ў медпункце прыёмніка-размеркавальніка бежанцаў у Беластоку, і для анкашпіталя гэта быў першы такі кейс.
— У іх здарыўся нейкі пердзюманокль з афармленнем мяне, які выліўся ў гэты квэст праз два гады.
Але ўсё ж беларуска дамаглася свайго.
— Але я іх перамагла! І яны нават выбачыліся! NFZ выбачыўся, уяўляеце?! Божа, якія цудоўныя людзі! І я не буду прадаваць нырку! Ды ніхто б і не купіў яе, з падазрэннем-та на злаякаснае ўтварэнне! — жартуе Кацярына.
Яна падзякавала ўсім, хто прапанаваў дапамогу.
Кацярына Ваданосава — пра рак, як дзеці ставяцца да хваробы і пра надзею
Не забудзь падпісацца на MOST у Тэлеграм. Мы галоўнае медыя беларусаў у Польшчы.
