Як замежніку пабудаваць новае жыццё ў Польшчы? Як жыць і дзе працаваць? Як дасягнуць поспеху ў гэтай краіне? MOST спытаў у мінакоў на вуліцах Беластока, якія парады яны б далі беларусам, якія пераязджаюць у Польшчу.
«Каб яны вывучалі нашу польскую мову»
— Каб яны вывучалі нашу польскую мову. Каб паводзілі сябе культурна, як і мы.
— А калі яны ўжо вывучаць мову?
— Каб яны інтэграваліся з намі.
***
— Хутчэй ехаць далей на захад.
***
— Вывучыць мову і працаваць.
«Мы прыстасоўваемся, калі мы ў кагосьці ў гасцях»
— Адаптавацца да нашых правілаў. Давайце паважаць унутраную культуру, паважаць унутраныя правілы і прыстасоўвацца да іх. Скажам шчыра, калі мы заходзім у дом, мы не навязваем свой парадак, мы прыстасоўваемся, калі мы ў кагосьці ў гасцях.
***
— Каб яны прыстасоўваліся да ўмоў у Польшчы і да нашага жыцця.
***
— Самае галоўнае — не здавацца. Браць, так бы мовіць, тое, што тут ёсць, як сваё. Проста трымацца гэтага і паціху спрабаваць уладкаваць сваё жыццё ў іншым месцы. Не ўспрымаць гэта, быццам мы чужынцы, а проста спрабаваць далучацца да супольнасці тут, карыстацца тым, што ёсць, і ўсё.
***
— Скончыць добрую школу, пазнаёміцца з разумнымі, цікавымі людзьмі, а іх шмат. І гэта фактычна адзіны рэцэпт поспеху.
«Паспрабаваць асімілявацца тут»
— Адназначна трэба брацца за працу. Так бы мовіць, не разлічваць на халяўныя грошы. І ёсць пытанне вывучэння мовы, таму што многія замежнікі да гэтага ставяцца абыякава, з-за чаго потым узнікаюць праблемы.
***
Знайсці працу.
— І гэтага дастаткова?
— Так.
— А мова? Усе гавораць пра мову.
— Не, я думаю, знайсці працу, а мова прыйдзе з часам.
***
— Асімілявацца ў грамадства. Не шукаць канфліктаў, проста ладзіць. Кожны хоча недзе жыць і жыць спакойна і бяспечна. Гэта галоўная ідэя. Будзьма справядлівымі адзін да аднаго, добрымі адзін да аднаго. І неяк мы з гэтым усім справімся, з гэтымі часамі, якія цяпер насталі.
***
— Так як палякі селяцца ў іншых месцах свету і неяк павінны асімілявацца з сітуацыяй, думаю, што людзі, якія прыязджаюць да нас, таксама шукаюць лепшага жыцця і павінны неяк паспрабаваць асімілявацца тут.
«Не шукаць працы любой цаной»
— Як тут жыць і зарабляць? Куды пайсці?
— Я сам з гэтым спрабую разабрацца! Я лічу, што спачатку трэба знайсці працу, каб хаця б мець грошы, а потым, напрыклад, прайсці курсы і развівацца далей у тым напрамку, які табе цікавы і ў якім у цябе атрымліваецца, што ты хацеў бы рабіць у будучыні — і проста ісці ў гэтым кірунку. А потым шукаць працу ў гэтай сферы.
— Проста развівайцеся, набывайце адпаведную кваліфікацыю і працягвайце рухацца ў тым напрамку, у якім вы сапраўды можаце адчуваць сябе добра. Не шукаць працы любой цаной, а шукаць працу, у якой можна рэалізаваць сябе і сапраўды адчуваць сябе добра ў ёй.
***
— А калі гаварыць пра працу, то ў якую сферу лепш за ўсё ісці такому эмігранту, які толькі што прыехаў?
— Ну, гэта залежыць ад таго, у чым ён разбіраецца і якая ў яго адукацыя. Няма бар’ераў. Пытанне можа быць у мове. Калі хтосьці разбіраецца ў будаўніцтве, ідзе ў будоўлю. Калі хтосьці мае вышэйшую адукацыю, я не бачу праблемы, каб і ў іншай краіне ішоў у сферу адпаведна сваёй адукацыі.
***
— Я думаю, што ў будаўніцтве, безумоўна, кожны можа зарабіць, калі нейкія навыкі мае. Асабліва з сённяшнімі цэнамі. А іншых сфер я не ведаю, я ў будаўніцтве ўсё жыццё, таму выказвацца на іншыя тэму не буду.
***
— Напэўна, найбольш у гастраноміі. Ну, напэўна, і будаўніцтва.
***
— Са свайго вопыту я бачу, што беларусы звычайна працуюць на будоўлях, па такіх крыху менш аплатных спецыяльнасцях. Прынамсі, як я назіраю.
— А дзе знайсці добры, прыстойны заробак?
— Ну, вы ведаеце, вы можаце спытаць гэта ў любога. Усім хочацца знайсці годную аплату працы. Не ведаю, у мяне няма ўплывовых сувязяў.
«Трэба ехаць да мяжы з Германіяй»
— А дзе ў Польшчы найлепш плацяць?
— Лекарам.
— На захадзе Польшчы.
— То бок, трэба ехаць далей?
— Так. Трэба ехаць туды, да мяжы з Германіяй. Познань, Гданьск, Шчэцін.
***
— А дзе ў Польшчы найлепш плацяць?
— Доктару — у бальніцы. Таму, хто раней працаваў у сферы грамадскага харчавання, — у грамадскім харчаванні.
***
— Каб мець добрыя грошы і добра зарабляць, трэба быць добра адукаваным, каб уладкавацца на працу, якая сапраўды дасць лепшы заробак, так? Ёсць таксама вялікая група людзей, якія прыязджаюць у Польшчу займацца фізічнай працай і на гэтым таксама могуць зарабіць. Аднак адукацыя або вопыт у такой індустрыі таксама вельмі дапамагаюць, праўда?
***
— Як можна добра зарабіць у Польшчы?
— Добра зарабляць? Гэта вельмі складанае пытанне. Я думаю, што на гэта няма добрага адказу. Я мяркую, што лепш за ўсё пачаць свой уласны бізнес, так? І атрымаецца ці не — ёсць рызыка, так? Хто не рызыкуе, той не п’е шампанскага.
***
— Што гэтыя людзі павінны зрабіць, каб іх жыццё тут было паўнавартасным?
— Проста прыехаць у Беласток, зняць кватэру і жыць тут.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
