29 чэрвеня суполка Varušniak адзначае свой першы год вялікім Купальскім фэстам у Варшаве. Гэта будзе свята для ўсіх 24 гадзіны запар, абяцаюць арганізатары. Дзённая частка фестывалю — для сямейнага адпачынку, а ноч — для аматараў тэхна.
— Час варушыць Варшаву зноў, паліць усё благое ды натхняцца на наступны год, — кажуць арганізатары.
На Купальскім фестывалі выступяць больш за 40 артыстаў, у тым ліку Ягор Забелаў, SPIEVY, Shuma, KOOB, Наста Рыдлеўская. Chornabrova прадставіць альбом з элементамі штучнага інтэлекту.
Летні дэнс ладзіць Пікнік LTCŃ — на асобнай сцэне выступяць таленавітыя беларускія дыджэі і селекцыянеры музыкі.
Што яшчэ будзе на Купальскім Варушняку
- карагод пад адкрытым небам
- урок купальскіх спеваў ад SPIEVY
- смачная ежа, халоднае піва і ліманад
- майстар-класы, вянкі, кветкі і флірт-гульні
- арт-маркет і часовыя арнамент-тату ад AURA TATOO
- дзіцячыя забавы з аніматарамі ў бярозавым гаі
Пасля вялікага купальскага вогнішча распачнецца ноч тэхна з Campderschein, зорка ночы — Schwefelgelb.
Чаму варта пайсці на Купалле
Купалле — сакральнае свята. Падчас рытуальных спеваў людзі спрадвеку маліліся агню ды палілі ў ім усё дурное, а прасілі ўсё добрае. Людзі чакалі ад гэтага свята паляпшэння здароўя, да агню падносілі хворых дзетак. Гэта таксама і свята свабоднага сексу, жарсці, кахання і флірту. Падчас святкавання замацоўваліся парачкі.
— Усе беларусы і беларускі на падсвядомым узроўні носяць беларускі культурны код. Купалле — тая кропка, калі трэба збірацца, трэба быць разам. Калі мы разам — мы моцныя, калі мы разам — мы сям’я. На жаль, абставіны склаліся так, што многія з нас страцілі свой дом, і мы вельмі тужым па ім. Таму Купальскі Варушняк стварае беларускі дом тут на месцы. Дзе мы — там і дом, — кажуць арганізатары.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
