Лідарка дэмакратычных сіл Беларусі Святлана Ціханоўская заклікала Польшчу змякчыць умовы правозу тавараў праз мяжу і выдаваць беларусам польскія візы. Гэтыя тэмы яна абмеркавала на сустрэчы з міністрам замежных спраў Польшчы Радаславам Сікорскім падчас публічнага форуму НАТА ў Вашынгтоне.
На сустрэчы ішла размова пра абмежаванні, з якімі сутыкнуліся беларусы ў апошнія некалькі дзён, у прыватнасці пры правозе рэчаў і тавараў для асабістага карыстання. Кіраўніца Аб’яднанага пераходнага кабінета звярнула ўвагу міністра на неабходнасць удакладніць інструкцыі, каб зняць ці змякчыць абмежаванні для фізічных асоб.
Таксама Ціханоўская абмеркавала з польскім міністрам сітуацыю на мяжы. Сікорскі распавёў, што сур’ёзна разглядаецца закрыццё мяжы для грузаперавозак. Дэмакратычная лідарка адзначыла, што важна захаваць пасажырскі рух праз мяжу.
Таксама Святлана Ціханоўская заклікала працягваць выдаваць беларусам польскія візы — як гуманітарныя, так і іншыя.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
