Каля 1200 рэканструктараў прынялі ўдзел у інсцэніроўцы знакамітай бітвы пад Грунвальдам. 13 ліпеня за гістарычнай рэканструкцыяй сачылі больш за 40 тыс. гледачоў.
Бітва паміж войскам Тэўтонскага ордэна і злучаным войскам Польскага Каралеўства і Вялікага Княства Літоўскага адбылася 15 ліпеня 1410 года. Яна праходзіла недалёка ад вёсак Грунвальд, Таненберг і Ладвігова (Усходняя Прусія, сучасная Польшча). Поўную перамогу ў бітве атрымалі саюзныя войскі Ягайлы і Вітаўта. Магістр Тэўтонскага ордэна Ульрых Фон Юнгінген быў забіты на полі бітвы.
Грундвальдская бітва — адна з найважнейшых бітваў сярэднявечнай Еўропы. Палітычнае значэнне перамогі саюзных войскаў было вельмі важным у гісторыі Польскага Каралеўства і ВКЛ — была спынена нямецкая экспансія на прыбалтыйскія і ўсходнеславянскія землі і пакладзены пачатак палітычнаму заняпаду Тэўтонскага ордэна. ВКЛ атрымала выхад на балтыйскія гандлёвыя шляхі, а значыць, і ў Еўропу.
Пастаноўка знакамітай бітвы 1410 года стала асноўным момантам святкавання дзён Грунвальда. Традыцыйна аб’яднаныя польска-літоўскія войскі разграмілі рыцараў Тэўтонскага ордэна.
Рэканструкцыя бітвы пад Грунвальдам праходзіла ў 26-ы раз і з’яўляецца найбуйнейшым сярэднявечным гістарычным відовішчам у Польшчы. Штогод святкаванне Дня Грунвальда прыцягвае рэканструктараў з рыцарскіх брацтваў па ўсёй Еўропе.
Афіцыйнага прадстаўніка з беларускага боку на мерапрыемстве ў гэтым годзе не было, але некалькі груп беларусаў прыехалі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
