Беларусы адзначаюць чацвёртую гадавіну прэзідэнцкіх выбараў у Беларусі, якія адбыліся 9 жніўня 2020 года. У гэты дзень у розных гарадах свету і Польшчы запланаваныя мерапрыемствы пад агульнай назвай Дзень годнасці. Дэмакратычная лідарка Святлана Ціханоўская ў гэты дзень звярнулася на беларусаў, якія засталіся на радзіме і якія жывуць у эміграцыі.
«Чатыры гады таму адбыліся падзеі, якія памянялі нашую краіну, і памянялі нас з вамі, — нагадала яна. — Я памятаю тую неймаверную энергетыку на плошчах. Мы ўсе верылі ў хуткія перамены. Нам здавалася, што вось-вось, дыктатура рухне, і мы зможам пабудаваць краіну, пра якую так доўга марылі і за якую змагаліся.
Я чула такую думку, што ў беларусаў маўчанне — не значыць згода. Гэта значыць, мы затаіліся, мы рыхтуемся да новага моманту, а ён абавязкова будзе».
Беларусам унутры краіны Ціханоўская падзякавала за смеласць і цярплівасць. «Я не прашу вас рызыкаваць: не той момант. Цяпер той час, калі трэба зберагчы сябе», — сказала яна.
Таксама яна звярнулася да беларусаў за мяжой: «Пакуль унутры краіны немагчымыя актыўныя дзеянні, нам з вамі трэба развіваць усё вонкі. Вельмі важна развіваць нашую беларускую супольнасць. Давайце зробім усё магчымае, каб гэты мур рухнуў, як і ўся гэта бесчалавечная сістэма».
Для гэтага, на яе думку, трэба працаваць з саюзнікамі і ўмацоўваць сувязі паміж сабой.
«Давайце клапаціцца і падтрымліваць адно аднаго. Разам мы ўсё адолеем і абавязкова завяршым тое, што пачалі ў 2020-м», — запэўніла Святлана Ціханоўская.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
