Беларуская рада культуры абвясціла тыдзень салідарнасці з мастачкай Нінай Маргаевай. Беларуска ў эміграцыі раптоўна цяжка захварэла.
Ніна з’ехала ў Польшчу з сынам у 2022 годзе. У эміграцыі жанчына атрымала статус дадатковай абароны. У студзені 2023 года ў Варшаве ў Ніны дыягнаставалі бакавы аміятрафічны склероз (БАС). На дадзены момант гэтая хвароба з’яўляецца невылечнай, яна хутка прагрэсуе.
«Я здымаю кватэру, утрымліваю сына і пакрываю ўсе выдаткі на лячэнне. У цяперашні час мой фізічны стан значна пагоршыўся (не магу рухацца без падтрымкі, рукі амаль не працуюць, худнею), і мне патрэбна дапамога апекуна, якому таксама трэба плаціць», — піша Ніна ў абвестцы на старонцы Фундацыі «Kawałek Nieba».
Беларуская рада культуры абвясціла, што ўсе данаты, якія паступяць цягам гэтага тыдня, будуць перададзены Ніне.
«Мы, як і іншыя прадстаўнікі творчай супольнасці Беларусі, шакаваныя навіной пра цяжкую сітуацыю з нечаканай хваробай мастачкі Ніны Маргаевай. Заклікаем усіх неабыякавых беларусаў далучыцца да збору. Акрамя сабраных сродкаў, якія паступяць на наш рахунак, мы таксама будзем шукаць дадатковыя магчымасці для дапамогі Ніне», — такі допіс з’явіўся на старонцы Беларускай рады культуры ў Facebook.
Падтрымаць Ніну Маргаеву можна праз Беларускую раду культуры і збор на старонцы Фундацыі «Kawałek Nieba»
