Беларусы стварылі Тэлеграм-бота, які дапамагае знайсці ў Варшаве месцы, падобныя да тых, што падабаліся карыстальнікам у Мінску. Зараз праз dze*ja можна знайсці ў польскай сталіцы кавярню, месца, дзе падаюць сняданкі, а таксама забавы.
— Калі мы пераехалі, то ўвесь час пыталіся ў знаёмых, якія эмігравалі крыху раней: «А дзе тут кавярня накшталт мінскага “Зерно”? А барчык, падобны да “Свабоды, 4”? А мясцовая “Пясочніца” ці “Камароўка”»? І яны мэтчылі нашы старыя густы з новай рэальнасцю. Цяпер мы вырашылі падзяліцца гэтымі мэтчамі з вамі», — патлумачылі стваральнікі сваю ідэю ў групе «Беларусы ў Варшаве».
Пакуль бот працуе толькі на закрытым спісе мінскіх месцаў. Ён прапануе выбраць варыянт са спісу — упісаць месца самому не атрымаецца. Напрыклад, аматарам выпіць кавы з дэсертам у «Каравае» бот раіць наведаць цукерню La bombaniera. А тым, каму падабалася прастору ОК16, рэкамендуецца пайсці ў Nowy Teatr.
Пакуль месцаў няшмат, але стваральнікі прапануюць карыстальнікам дзяліцца сваімі перавагамі і абяцаюць дадаць варыянты. Яны адзначаюць, што кавярні ім не плацяць, а месцы яны рэкамендуюць на свой густ.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
