Акцыі салідарнасці праходзяць у буйных гарадах Польшчы з 7 па 10 снежня. Мерапрыемствы прымеркаваныя да Міжнароднага дню правоў чалавека.
«Мы яшчэ раз хочам звярнуць увагу на бясконцыя парушэнні ўсіх магчымых правоў і законаў у сучаснай Беларусі. Па ўсёй краіне не спыняюцца арышты, рэпрэсіі не заціхаюць, шмат хто з тысяч палітзняволеных знаходзіцца ў рэжыме інкамунікада. Помслівы рэжым працягвае свае лапы і за мяжу. Яшчэ нядаўна КДБ зладзіў выкраданне Васіля Верамейчыка, ваяра і сумленнага беларуса. Мы не можам маўчаць, таму мы выходзім. Мы — голас палітвязняў», — кажуць прадстаўнікі беларускай дыяспары.
Акцыі салідарнасці ўжо прайшлі ва Уроцлаве, у Беластоку, Гданьску і Шчэціне. 10 снежня ў Міжнародны дзень правоў чалавека мерапрыемства запланаваныя ў Варшаве:
- Акцыя каля помніка Каперніку. Пачатак а 14:00.
- У музеі Вольнай Беларусі будзе адкрыта выстава «Пачуцці», дзе будзе прадстаўлена калекцыя малюнкаў, створаных палітычнымі вязнямі Беларусі ва ўмовах турэмнага зняволення. Пачатак а 19:00.
Таксама да Міжнароднага дня правоў чалавека ў нацыянальнай мастацкай галерэі «Захэнта» ў Варшаве праходзіць «Марафон лістоў». Гэтую праваабарончую акцыю штогод праводзіць арганізацыя Amnesty International. Сярод адрасатаў таксама і беларускія палітвязні.
Па стане на 9 снежня ў Беларусі прызнаныя палітычнымі вязнямі 1288 чалавек. Журналісты, блогеры, бізнесмены, актывісты штабоў кандыдатаў у прэзідэнты, удзельнікі акцый пратэсту знаходзяцца ў месцах пазбаўлення волі. Большая частка гэтых людзей трапіла пад палітычна матываваны крымінальны пераслед у сувязі з падзеямі, якія разгарнуліся падчас і пасля кампаніі па выбарах прэзідэнта Беларусі ў 2020 годзе.
