У Еўрапейскім цэнтры Салідарнасці ў Гданьску адкрылася выстава беларускага дызайнера Артура Вакарава, прысвечаная 30 гадам кіравання Лукашэнкі. Яе назва — «30 гадоў дыктатуры ў 30 постарах» — перадае сутнасць праекта. Праз лічбу «30» аўтар паказвае наступствы дыктатуры: яна то ператвараецца ў дзве першыя літары слова «ЗОНА», то становіцца часткай сігналу SOS.
Артур Вакараў — вядомы беларускі дызайнер, сузаснавальнік мінскай студыі «Адліга» і былы дырэктар мінскай крамы вінтажнай мэблі «Б/Уржуазные ценности». У 2020 годзе ён маляваў плакаты для маршаў пратэсту, а ў 2022-м з’ехаў з краіны і цяпер жыве ў Польшчы.
«Я пастанавіў зрабіць штосьці, што пакажа наступствы гэтых трыццаці гадоў з майго гледзішча», — цытуе яго словы Еўрапейскі цэнтр Салідарнасці.
Праект пераасэнсоўвае змены не толькі ў палітычным жыцці, але таксама і ў эканоміцы краіны, і ў адукацыі, якая, як канстатуецца, вярнулася да «савецкага падыходу, заснаванага на страху, паслухмянасці і бяздумным завучванні». Праз свае работы аўтар таксама выразіў крытычнае стаўленне да размяшчэння ў Беларусі ядзернай зброі, пераследу ЛГБТ-асоб і занепакоенасць выміраннем вёскі.
Упершыню выстава дэманстравалася ў Вільні ў ліпені 2024 года, а ў студзені 2025 года адкрылася ў Польшчы. Акрамя Гданьска, яна працуе таксама ў Музеі Вольнай Беларусі ў Варшаве. На абедзвюх пляцоўках яна будзе даступная да 5 лютага.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
