1 лютага беларусы зладзілі на Беласточчыне Kalinoŭski marš. Мерапрыемства было прымеркаванае да гадавіны паўстання 1863 года ў Беларусі і Літве (1 лютага) і дня нараджэння Кастуся Каліноўскага (2 лютага).
Марш пачаўся ў мястэчку Гарадок, адкуль удзельнікі прайшлі пяць кіламетраў да вёскі Страшава, несучы сцягі і скандуючы лозунгі.
У Страшаве беларусы ўшанавалі памяць пісьменніка Аляксея Карпюка, які нарадзіўся ў гэтай вёсцы, быў сябрам Васіля Быкава, а ў час Другой Сусветнай вайны кіраваў партызанскім атрадам імя Каліноўскага. Таксама згадалі вайсковага дзеяча часоў Беларускай Народнай Рэспублікі Міколу Дзямідава, які паходзіў з Гарадка і быў сваяком Каліноўскага. Каля прыдарожнай капліцы ўдзельнікі паклалі партрэты гэтых дзеячаў і запалілі знічы.
Адтуль актывісты вырушылі на аўтамабілях у вёску Мастаўляны, дзе нарадзіўся Кастусь Каліноўскі. Ганаровую варту каля помніка нацыянальнаму герою неслі ўдзельнікі клуба гістарычнай рэканструкцыі Invictus 1863. Да манумента ўсклалі вянок, кветкі і знічы. Прачыталі «Ліст з-пад шыбеніцы».
Мерапрыемства арганізаваў беластоцкі філіял арганізацыі «Рух» пры ўдзеле беларускай дыяспары Беластока, клуба гістарычнай рэканструкцыі Invictus 1863, «Беластоцкай харугвы» і «Беларускага дома». Арганізатары паведамляюць, што з меркаванняў бяспекі колькасць удзельнікаў была абмежаваная да пяцідзесяці чалавек, бо Мастаўляны знаходзяцца пры самай мяжы.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
