Беларусы ў Польшчы пачалі святкаваць Дзень Волі — свята прымеркаванае да гадавіны абвяшчэння незалежнасці Беларускай Народнай Рэспублікі 25 cакавіка 1918 года. Асноўныя мерапрыемствы прайшлі ў нядзелю 23 сакавіка. У Варшаве беларусы пранеслі праз цэнтр горада 330-метровы беларускі сцяг, а ў Беластоку паглядзелі выступ клуба гістарычнай рэканструкцыі Invictus 1863 і паслухалі канцэрт Лявона Вольскага.
У варшаўскім касцёле святога Аляксандра, дзе збіраюцца беларусы-каталікі, адбылася Святая Імша за Айчыну, а пасля яе — канцэрт хора «Голас цішы». У сярэдзіне дня на плошчы Трох Крыжоў сабраліся ўдзельнікі маршу. Яны разгарнулі 330-метровы бел-чырвона-белы сцяг і пранеслі яго па цэнтры польскай сталіцы да Замкавай плошчы.
Многія ўдзельнікі неслі нацыянальныя сцягі і самаробныя плакаты патрыятычнага і палітычнага зместу. На Замкавай плошчы на сцэне адбыўся мітынг, падчас якога намеснік кіраўніка Аб’яднанага пераходнага кабінета Павел Латушка ўручыў медалі «За плённую працу на карысць Беларусі». У акцыі ўдзельнічалі некалькі соцень чалавек.
У Беластоку набажэнства за беларускі народ адбылося ў праваслаўнай царкве святога Яна Багаслова. На вулічнае святкаванне каля ратушы на Рынку Касцюшкі прыйшлі каля паўтары сотні чалавек. На мітынгу прамаўлялі беларускія і ўкраінскія грамадскія дзеячы, а таксама прадстаўнікі мясцовых уладаў — падляскі ваявода Яцак Бжазоўскі і віцэ-прэзідэнт Беластока Рафал Рудніцкі.
Сябры клуба гістарычнай рэканструкцыі Invictus 1863 прайшлі перад удзельнікамі ў строях часоў Студзеньскага паўстання. Потым выступіў спявак Лявон Вольскі.
Мерапрыемствы з нагоды Дня Волі прайшлі і ў іншых гарадах Польшчы. У Кракаве днём адбылася экскурсія па месцах, звязаных з беларускай гісторыяй, а ўвечары – лекцыя «Спробы стварэння ўзброеных сіл БНР». У Познані беларусы прайшлі шэсцем з плошчы Адама Міцкевіча да плошчы Свабоды.
Перад Днём Волі Следчы камітэт Беларусі выступіў з пагрозамі, што будзе заводзіць крымінальныя справы, праводзіць ператрусы ў сваякоў і арыштоўваць нерухомасць у беларусаў, якія выйдуць за мяжой на святочныя акцыі. З гэтай прычыны святкаванні былі адносна нешматлікімі, а некаторыя ўдзельнікі хавалі свае твары.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
