Летні пікнік Letucień у Кракаве — фестываль, які ўжо пяць гадоў запар збірае беларусаў і беларусак з усяго свету — апынуўся пад пытаннем. Арганізатары паведамляюць, што без падтрымкі ён можа не адбыцца, і збіраюць сродкі на правядзенне мерапрыемства.
Letucień — некамерцыйная падзея, якую ладзяць больш за 30 арганізатараў і 70 валанцёраў. Апошнія тры гады яна праходзіць у вялікім гарадскім парку Jordana. У 2024 годзе фэст наведалі больш за 5 тыс. чалавек.
Тады на арганізацыю спатрэбілася каля 100 тыс. злотых, з якіх амаль 40% склалі данаты. Сёлета мэта збору — 105 тыс. злотых. Каб фестываль адбыўся, да 1 чэрвеня трэба сабраць як мінімум 70% ад гэтай сумы (дапамагчы можна тут).
Калі сабраць сродкі атрымаецца, арганізатары плануюць тры музычныя сцэны: галоўная сцэна з трыма-чатырма артыстамі, электронная пляцоўка з актуальнымі беларускімі дыджэямі і live-выканаўцамі і этна-сцэна з народным каларытам.
Акрамя таго, плануецца адкрыць вялікую дзіцячую пляцоўку з праграмай гульняў, майстэрань і заняткаў, фудкорт на тузін фудтракаў — ад дранікаў і блінцоў да лацінаамерыканскіх эмпанадас, а таксама кірмаш, да якога далучыцца каля 40 майстроў і майстрыц з аўтарскімі вырабамі.
У рамкам фестывалю будзе арганізаваная літаратурная пляцоўка ад Pradmova, а таксама адукацыйная праграма з інтэрактыўнымі выступамі, размовамі і дыскусіямі. На пляцоўцы салідарнасці можна будзе падтрымаць палітзняволеных і даведацца больш пра грамадскія ініцыятывы. Дадаткова арганізатары задумалі новую псіхалагічную пляцоўку.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
