У Варшаве, у Кракаўскім прадмесці каля помніка Мікалаю Каперніку, пачала дзейнічаць арт-інсталяцыя «Нязломныя». На стэндах — партрэты зняволеных беларускіх праваабаронцаў, звараныя з металічных прутоў.
У цэнтры польскай сталіцы можна ўбачыць партрэты старшыні праваабарончага цэнтра «Вясна», нобелеўскага лаўрэата Алеся Бяляцкага, а таксама яго калег па «Вясне» — Валянціна Стэфановіча, Уладзіміра Лабковіча і валанцёркі цэнтра Марфы Рабковай. Упершыню на выставе няма партрэта Андрэя Чапюка — 18 красавіка ён выйшаў на волю.
Варшава стала другім польскім горадам, дзе ладзіцца выстава. У верасні мінулага года арт-інсталяцыю «Нязломныя» выстаўлялі ў Познані. Таксама выстава працавала ў Бельгіі, Даніі, Германіі, Літве, Чэхіі.
— Мы заўсёды шукаем новыя формы і спосабы пашырэння інфармацыі пра сітуацыю з нашымі зняволенымі калегамі. <…> З аднаго боку, гэта адлюстраванне тых суровых умоваў, у якіх знаходзяцца вясноўцы і тысячы палітзняволеных у Беларусі. З іншага — непахіснасць вясноўцаў у прынцыпах і адданасці каштоўнасцям правоў чалавека, свабоды і дэмакратыі, — кажа Марына Кастылянчанка, праваабаронца «Вясны».
Арт-інсталяцыя «Нязломныя» будзе працаваць у Варшаве да 7 ліпеня.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
