Беларускія эмігранты адкрылі ў Варшаве інтэрнэт-краму, дзе можна набыць кнігі, адзенне, сувеніры і прадметы з нацыянальнай сімволікай. Праект The Krama накіраваны на тых, хто жыве за мяжой і хоча захаваць сувязь з Беларуссю праз знаёмыя рэчы і культурныя сімвалы. MOST вывучыў вітрыну крамы і падабраў там падарункі на любы выпадак.
Цішоткі з сімвалічнымі выразамі і шоперы з коцікамі
У раздзеле «Адзенне» можна знайсці цішоткі з сімваламі і выразамі, якія за апошнія гады набылі для беларусаў асаблівае гучанне. Напрыклад, «Доўгая дарога дадому», «Хопіць гвалціць» ды іншыя. Тут жа прапануюць і шоперы — як класічныя, так і з іранічнымі ілюстрацыямі, напрыклад з коцікамі.
Ад дзіцячых вершаў да культавай прозы
У раздзеле «Кнігарня» прадстаўленыя кнігі сучасных беларускіх аўтараў і пераклады сусветнай літаратуры. Сярод іх «Нетутэйшая далечыня» Ігара Кулікова і «Гвалт» Аляксандра Чарнухі. Асаблівы інтарэс выклікаюць успаміны Ларысы Геніюш «Птушкі без гнёздаў» і аповесць Васіля Быкава «Мёртвым не баліць», надрукаваная без цэнзуры. Яна ўваходзіць у другое поўнае выданне твораў Быкава, якое вяртае іх у арыгінальны выгляд, дазваляючы чытачу ўбачыць аўтара так, як ён сам гэта задумаў. Гэта ўнікальны выпадак у беларускай літаратуры, які робіць гэтыя кнігі асабліва каштоўнымі для аматараў класікі.
Асобнае месца займае дзіцячая літаратура: кнігі вершаў Андрэя Скурко «Пра сланоў і барсучкоў», «Хто жыве ў гаражы», «Стукі-грукі — што за гукі», а таксама кніга Ганны Янкуты «Кот Шпрот і вежавы гадзіннік».
Каляндар для тых, хто пачынае жыццё нанова
Асобнай увагі заслугоўвае «Каляндар адаптацыі ў новай краіне». Ён прызначаны для эмігрантаў і тых, хто толькі рыхтуецца да пераезду. У календары 12 практыкаванняў, якія дапамогуць паступова адаптавацца да новых абставін. Кожнае практыкаванне суправаджаецца тлумачэннем і інструкцыяй, грунтуецца на прынцыпах піраміды патрэб Маслоў. Пачаць можна ў любы момант, бо каляндар не прывязаны да канкрэтных дат.
Для душы і побыту
Сярод іншых прапаноў — вокладкі на пашпарт з нацыянальнымі матывамі, паштоўкі з выявамі Мінска, нататнікі, драўляныя скрыначкі, падсвечнікі ды іншыя прадметы, якія нясуць цеплыню і настальгію па радзіме.
Сувеніры і падарункі ад двух злотых
У краме можна знайсці сувеніры і падарункі на любы бюджэт — ад класічных магніцікаў з беларускім арнаментам да яркіх налепак і зручных падставак пад гарачае. Кошт такіх прыемных дробязей пачынаецца ад 2 злотых.
Як зрабіць замову?
Аформіць замову можна праз сайт thekrama.com. Пры замовах ад 250 злотых дзейнічае бясплатная дастаўка па ўсёй Польшчы, а адпраўка здзяйсняецца ўжо на наступны дзень. Дастаўка дзейнічае па ўсёй Еўропе.
