У Польшчы распачаўся набор ва Універсітэт Залатога Веку. Гэта адукацыйна-інтэграцыйная пляцоўка для сталых беларусаў, якія жывуць у гэтай краіне. Яна працуе ўжо ў чатырох гарадах: Варшаве, Беластоку, Гданьску, Уроцлаве. Цяпер там вядуць набор удзельнікаў ва ўзросце 55+.
— Мы хочам стварыць прыязныя для сталых людзей пляцоўкі ў Польшчы, дзе яны знойдуць увагу, цеплыню, новыя веды і спрыяльнае асяроддзе, — пішуць арганізатары.
Для студэнтаў арганізуюць мерапрыемствы, дзе яны могуць знайсці новых знаёмых, і карысныя бясплатныя заняткі, напрыклад па польскай мове, фінансавай граматнасці, акцёрскім майстэрстве, бяспецы ў інтэрнэце, скандынаўскай хадзьбе, правільным харчаванні, паляпшэнні памяці і многія іншыя.
Неабавязкова наведваць усе заняткі. Можна зарэгістравацца на асобныя курсы на сайце ўніверсітэта.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
