Падчас візіту ў Варшаву Святлана Ціханоўская абмяркоўвала з маршалкам Сената Малгажатай Кідава-Блоньскай пытанні легалізацыі беларусаў. Пра гэта MOST паведаміў дарадца па дыпламатычных пытаннях Дзяніс Кучынскі.
«Абмяркоўвалі важнасць паскарэння легалізацыі беларусаў, у тым ліку, безумоўна, тых герояў і гераінь — беларускіх палітвязняў, — якія былі вызваленыя ў снежні і падаліся на міжнародную абарону», — расказаў ён.
Кучынскі дадаў, што падчас сустрэчы польскі бок падкрэсліў, што будзе старацца прымаць рашэнні як мага хутчэй, у межах дзеючага заканадаўства.
«Таму ў бліжэйшыя месяцы будзем спадзявацца на добры рэзультат», — зрабіў выснову Кучынскі.
Таксама падчас сустрэчы бакі размаўлялі пра ўмовы адкрыцця банкаўскіх рахунках для беларусаў, якія знаходзяцца ў працэдуры легалізацыі. Нагадаем, зараз польскія банкі патрабуюць для гэтага ВНЖ, але шмат у каго на руках ёсць толькі часовыя пасведчанні асобы, якія выдаюцца на час разгляду справы аб міжнароднай абароне. Таксама праблемы тычыцца тых беларусаў, якія знаходзяцца ў Польшчы па візе ці чакаюць разгляду справы аб ВНЖ.
«На наступным тыдні Святлана Ціханоўская наведае Давос, і мы паспрабуем там сустрэцца з кіраўніцтвам некаторых польскіх банкаў, каб з імі асобна прагаварыць гэтую праблему», — сказаў Кучынскі.
Яшчэ адно пытанне, якое беларуская лідарка абмяркоўвала з маршалкам Сената, — важнасць таго, каб знайсці магчымасць прадаўжэння тэрміну дзейнасці праязнога дакумента іншаземца. Зараз яго выдаюць толькі на год.
«Гэта зменшыла б бытавыя цяжкасці для беларусаў, але з іншага боку — таксама зменшыла б нагрузку на польскія органы», — канстатаваў Кучынскі.
Ён таксама расказаў, што каманда Святланы Ціханоўскай робіць асобны фокус быў на важнасці салідарнасці з беларусамі Падляшша. У гэтым годзе яна плануе здзейсніць візіт на Падляшша (а магчыма, не адзін), каб сустрэцца з арганізацыямі, школамі і ініцыятывамі.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
