Праваслаўныя, якія жывуць на Падляшшы — у рэгіёне, што мяжуе з Беларуссю, — адзначылі Вадохрышча. Акунацца ў палонку тут не прынята, а вось рубіць у лёдзе крыж і асвячаць ваду — традыцыя. MOST паглядзеў, як мясцовыя жыхары і беларускія эмігранты праводзяць гэтае свята.
— На Падляшшы асвячаюць ваду, потым асвячаюць хату свянцонай вадой, — расказвае Зміцер Косцін, журналіст Radio Białystok, які вядзе перадачы для беларусаў Падляшша. — Толькі ў некаторых месцах асвячаюць ваду адкрытую. У форме крыжа вырубаюць палонку для асвячэння. У Супраслі, напрыклад, ёсць традыцыя асвячэння вады ў рацэ.
Па словах Косціна, мясцовыя жыхары не акунаюцца і ўвогуле ўспрымаюць традыцыю акунання хутчэй як расійскую.
А вось беларускія і ўкраінскія эмігранты, якія жывуць у Варшаве, 19 студзеня зладзілі акунанне на возеры Чарнякоўскае. Гэта традыцыйнае месца збору на Вадохрышча. Па словах беларуса Сяргея Вялічкі, які прыняў удзел у абрадзе, там сабралася больш за 100 чалавек.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
