Беларусы зладзілі на Беласточчыне Kalinoŭski marš, прымеркаваны да гадавіны паўстання 1863 года ў Беларусі і Літве, дзе яно пачалося 1 лютага. Таксама нагодай стаў дзень нараджэння Кастуся Каліноўскага — 2 лютага па новым стылі.
Марш пачаўся ў мястэчку Гарадок, вядомым многім беларусам па фэстах «Басовішча» і «Тутака». Падчас паўстання 1863-64 гадоў у яго ваколіцах актыўна дзейнічалі партызанскія атрады. Далей удзельнікі маршу працягнулі шлях аўтапрабегам да вёскі Мастаўляны, дзе ў 1838 годзе нарадзіўся Кастусь Каліноўскі. На ўездзе ў вёску ўдзельнікаў сустракалі сябры клуба гістарычнай рэканструкцыі Invictus 1863, апранутыя ў паўстанцкія строі. Разам яны рушылі па вуліцах Мастаўлянаў да помніка Каліноўскаму.
Затым марш прайшоў да ўскрайкаў Мастаўлянаў, дзе калісьці стаяў сядзібны дом роду Каліноўскіх. Тут плануецца стварыць музейны комплекс.
Гэта ўжо другі Kalinoŭski marš, ён сабраў каля 100 чалавек. Арганізатарам выступіла арганізацыя «РУХ», партнёрамі — Беларуская дыяспара Беластока і клуб гістарычнай рэканструкцыі Invictus 1863.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
