21 лютага адзначаецца Дзень роднай мовы. У Польшчы да гэтай даты запланавалі шэраг мерапрыемстваў.
У некалькіх гарадах пройдуць дыктоўкі. У Варшаве на яе запрашае крама «Вырай». Тэкст будзе чытаць Зянон Пазьняк.
У Беластоку беларуская дыктоўка адбудзецца паводле знакамітага эсэ Уладзіміра Арлова «Незалежнасць — гэта…», якое прадыктуе аўтар.
Ва Уроцлаве дыктоўку ладзіць «Мова нанова»: тэкст прачытае паэт, перакладчык і літаратуразнаўца Андрэй Хадановіч. Далей святкаванне адбудзецца ў дэгустацыйным фармаце: удзельнікаў чакае традыцыйны пітны мёд — мерапрыемства пройдзе з Уладзімірам Шымбарэвічам, знаўцам і практыкам, які стварыў больш за 50 гатункаў. Таму арганізатары просяць узяць з сабой кілішкі.
Таварыства беларускай мовы ў Лодзі таксама ладзіць беларускую дыктоўку да Дня роднай мовы. Арганізатары паведамляюць, што пісьмовыя прылады браць неабавязкова: усё неабходнае дадуць.
У Кракаве да Дня роднай мовы ладзяць квіз.
24 лютага ў Беластоку да Дня роднай мовы будзе прымеркаваны фінал V Дэкламатарскага конкурсу. Ён адбудзецца на сцэне Беластоцкага тэатра лялек.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
