Рукапісны архіў парафіі ў Вялікіх Эйсмантах, што на Гродзеншчыне, набыла ініцыятыва MALDZIS. Дакумент датаваны першай паловай XIX стагоддзя. На польскі аўкцыён, дзе выстаўлялася кніга, першым звярнуў увагу MOST.
«Гэта вельмі каштоўная крыніца інфармацыі пра тагачаснае канфесійнае і свецкае жыццё рэгіёна», — паведаміла ініцыятыва MALDZIS.
Гэта так званы капіярый — зборнік распараджэнняў царкоўных і свецкіх уладаў, а таксама рознага службовага ліставання. У ім захаваліся звесткі пра жыццё парафіі і мясцовай супольнасці, трапляюцца прозвішчы мясцовых жыхароў, сустракаюцца згадкі пра метрычныя акты, асобныя сямейныя гісторыі, нататкі пра вакцынацыю ад воспы, будаўніцтва касцёла і шмат іншага.
Большасць запісаў належыць настаяцелю парафіі і гродзенскаму дэкану Міхалу Сезянеўскаму (1784–1850). Яны вяліся цягам 14 гадоў і датуюцца першай паловай XIX стагоддзя.
«Амаль штодзень недзе ў свеце прадаюцца калекцыйныя рэчы, звязаныя з Беларуссю. Але сустрэць у продажы каштоўнасць, вывезеную з беларускай тэрыторыі, звязаную з ёй зместам і праз паходжанне, калі да таго ж месца ўзнікнення дакладна вядомае, — гэта сапраўдная рэдкасць», — лічыць кіраўнік ініцыятывы MALDZIS Павел Мацукевіч.
Рукапісная кніга была набытая на сродкі мецэната ініцыятывы MALDZIS Іллі Пакроўскага. У ініцыятыве абяцаюць, што ў будучыні кніга ў якасці грамадскага падарунка вернецца на сваё месца — у парафію ў Вялікіх Эйсмантах. Як раней паведамляў MOST, цяпер у парафіі няма кніг старэйшых за другую палову XX стагоддзя.
У найбліжэйшых планах MALDZIS таксама — адлічбаванне рукапіснага зборніка, каб зрабіць яго дасяжным для ўсіх зацікаўленых гісторыкаў і краязнаўцаў.
Стартавая цана выдання складала 2850 злотых, а ў выніку кніга была прададзеная за 6325 злотых.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
