Школа журналістыкі IFAE распачынае 30-ы набор. Заяўкі на ўдзел прымаюцца да 1 красавіка.
Навучанне складаецца з:
- Кароткатэрміновага (4 дні) экспрэс-курсу па асновах журналістыкі (18-21 красавіка), які закладзе базу. Вядоўцамі будуць дасведчаныя журналісты і рэдактары, якія штодня працуюць з тэкстамі, відэа, інфаграфікай і г.д.;
- Анлайн-стажыроўкі ў рэдакцыях беларускіх медыяў (красавік-травень);
- Дадатковых анлайн-заняткаў;
- Конкурсу лепшых публікацый (чэрвень) з грашовымі ўзнагародамі для лепшых аўтараў публікацый, падрыхтаваных за час практыкі.
Удзельнікі, якія пройдуць увесь цыкл навучання, атрымаюць сертыфікаты аб сканчэнні Школы журналістыкі. Самыя актыўныя выпускнікі і выпускніцы будуць таксама запрошаныя ў чэрвені 2026 года на IFAE MediaJam — сустрэчу выпускнікоў, прысвечаную развіццю карысных медыякампетэнцый і наладжванню карысных сувязяў.
Што гэта за школа і для каго
IFAE рыхтуе маладых беларускіх журналістаў амаль 30 гадоў, а з 2023 года ладзіць заняткі на тэрыторыі Польшчы.
Да ўдзелу ў школе запрашаюцца беларусы з Польшчы і Літвы. Магчымы ўдзел людзей і з іншых краін у выпадку гатоўнасці ўдзельнікаў самастойна аплаціць праезд (арганізатары кампенсуюць дарожныя выдаткі ў памеры, эквівалентным 55 доларам).
Запрашаюцца ўдзельнікі, якія маюць невялікі досвед журналісцкай працы альбо толькі плануюць паспрабаваць сябе ў журналістыцы. Вітаюцца таксама заяўкі ад людзей, якія плануюць развіваць уласныя медыяпраекты (блогі, ютуб-каналы, падкасты і г.д.).
Як заявіцца?
Заяўкі на ўдзел прымаюцца да 1 красавіка. Пасля гэтага адабраным будзе прапанавана пацвердзіць свой удзел.
Прыярытэтам пры адборы будуць карыстацца асобы, якія якасна апішуць сваю матывацыю і падрабязна адкажуць на іншыя пытанні ў форме заяўкі.
