Кацярыну, беларуску з Варшавы, даўно турбаваў зуб мудрасці, але паход да ўрача яна адкладала. А калі стала зразумела, што цягнуць больш нельга, паспрабавала запісацца на прыём па дзяржаўнай страхоўцы NFZ, каб выдаліць зуб. Аднак аказалася, што ва ўсіх клініках чэргі. Тады ёй падказалі альтэрнатыўны варыянт — цэнтр пры Варшаўскім медыцынскім універсітэце. Там прынялі хутка. Але ёсць нюанс: на прыёме прысутнічае студэнт або нават сам працуе пад наглядам урача. Кацярына падзялілася з MOST уражаннямі, а мы даведаліся, як функцыянуе такая схема аказання дапамогі.
Спачатку Кацярына думала ісці ў прыватную клініку, дзе трапіць да ўрача можна хутчэй. Але цэны яе спынілі.
— Гэта выглядае зусім нерацыянальна: 800 злотых за тое, каб вырваць зуб. Мне было б танней нават з’ездзіць ва Украіну і зрабіць гэта там разам з іншымі зубамі, — кажа яна.
Кацярына патэлефанавала ў цэнтр пры ўніверсітэце. Там падказалі, што прыём пачынаецца каля 7:30 і лепш прыйсці загадзя. Яна прыехала прыкладна за гадзіну да адкрыцця і ўжо была трэцяй у чарзе. Да 7:30 людзей стала значна больш — чарга хутка расла.
Пасля адкрыцця трэба было ўзяць талончык і прайсці рэгістрацыю: пакінуць базавыя даныя, пасля чаго пацыентаў накіроўвалі на другі паверх у чакальню. Прыём пачынаўся з 8:00. Спачатку запрашалі тых, каму трэба было зняць швы. Пацыентаў прымалі не ў асобных пакоях, а ў вялікай прасторы, падзеленай шырмамі.
Калі падышла чарга Кацярыны, яе спачатку агледзелі і задалі некалькі стандартных пытанняў пра здароўе. Спыталі, ці ёсць у яе здымак. У беларускі не было — таму зрабілі на месцы, але за паслугу прыйшлося заплаціць 120 злотых. Гэта быў адзіны выдатак.
Са здымкам Кацярына вярнулася ў кабінет. Урачы пацвердзілі, што зуб трэба выдаляць, і прапанавалі зрабіць гэта адразу. Яна пагадзілася — усё прайшло хутка, пасля выдалення дзяўчыне наклалі швы. Зняць іх трэба было праз тыдзень — тут жа і таксама бясплатна.
У кабінеце было два чалавекі: адзін выконваў працэдуру, другі назіраў. Хто з іх быў студэнтам, а хто доктарам, Кацярына не зразумела.
Як працуе такі цэнтр
Медцэнтр працуе як звычайная клініка. Ён прапануе паслугі як платна, так і па страхоўцы NFZ. Калі пацыент выбірае прыйсці па страхоўцы, то на прыёме можа быць (хоць і неабавязкова будзе) студэнт. Але ён не можа працаваць адзін, заўсёды яго будзе кантраляваць дасведчаны ўрач.
Па NFZ аказваюць не ўсе паслугі, а толькі тыя, якія па агульных правілах фінансуюцца з дзяржаўнага фонду, як і ва ўсіх іншых клініках. У стаматалогіі без запісу прымаюць на выдаленне зубоў. Каб атрымаць планавае лячэнне, хірургічную, артадантычную дапамогу, трэба запісацца. Як правіла, рэгістратар паведаміць, ці будзе на прыёме студэнт.
У клініцы працуюць не толькі стаматолагі. Ёсць і сямейныя ўрачы, і медыцына працы, і іншыя кірункі.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
