Ва ўрочышчы Барык, што каля Гарадка на Беласточчыне, 16-19 ліпеня адбываецца беларускі фэст TUTAKA. У праграме — выступы музыкаў, лекцыі, дыскусіі, майстар-класы. Расказваем, што можна будзе ўбачыць на фестывалі і як туды даехаць.
У межах фэсту на шасці тэматычных пляцоўках адбудзецца больш за 70 падзей: канцэрты, лекцыі, дыскусіі, кінапаказы, спектаклі, майстар-класы, сустрэчы і інтэрактыўныя зоны.
У музычнай частцы праграмы выступяць рок-гурт RIMI з Гарадка, Анастасія Рыдлеўская, Chornabrova, Vinsent, Dzieciuki, B:N:, Bizzare Objects, «Разбітае Сэрца Пацана», Roots Vibracja x Dub Rovah.
Адбудуцца дыскусіі на тэмы польскага досведу перамен у 1989 годзе, беларускага кнігавыдавецтва за мяжой, беларускай культуры ў Польшчы, таксама ўдзельнікі абмяркуюць іншыя пытанні беларускай эміграцыі.
Удзельнікі змогуць паслухаць лекцыю Анаіс Марын, спецдакладчыцы ААН па Беларусі. Адбудзецца сустрэча з аўтарскай камандай праектаў «Трызуб і Пагоня», «Сармат», «Беларусь 18|63» ад грамадскай кампаніі «Будзьма беларусамі» — Кацярынай Ваданосавай, Васілём Калачом і Алесем Кіркевічам.
Святар Аляксандр Кухта раскажа пра гісторыю, сучаснасць і будучыню беларускага праваслаўя. Валерыя Чарнаморцава — пра асобу аднаго з пачынальнікаў беларускага нацыянальнага руху Івана Луцкевіча.
Таксама адбудуцца сустрэчы з лідаркай дэмакратычных сіл Святланай Ціханоўскай, пісьменнікам і палітыкам Паўлам Севярынцам, юрыстам Максімам Знакам, псіхатэрапеўткай Ганнай Матуляк, кіраўніцтвам і вядоўцамі тэлеканала «Белсат».
Пад адкрытым небам пакажуць дакументальны фільм «Хто ты гэткі?» і мастацкі «Пад шэрым небам», зняты па матывах гісторыі беларускіх журналістаў Кацярыны Андрэевай і Ігара Ільяша.
Сёлета на фэсце з’явіцца дзіцячая пляцоўка з арэлямі і пясочніцай. Для дзяцей правядуць майстар-класы па вырабе саламяных конікаў, роспісе шопераў і закладак акрылавымі фарбамі. Падлеткі змогуць паўдзельнічаць у стварэнні перфомансу пад кіраўніцтвам тэатральнага педагога Андрэя Саўчанкі.
Адбудзецца футбольны турнір памяці памерлага ў турме мастака Алеся Пушкіна.
Таксама на фэсце будзе дзейнічаць фудкорт, кірмаш рамеснікаў і пункты беларускіх арганізацый, у тым ліку фонду BYSOL, Цэнтра беларускай культуры ў Беластоку, фонду «Прытуляй мяне!» і іншых.
З поўнай праграмай фэсту можна азнаёміцца тут.
Сёлета арганізатары ўпершыню зрабілі платны ўваход на фэст.
Да месца правядзення фэсту лёгка даехаць грамадскім транспартам. З Беластока да Гарадка (Gródek) курсуюць аўтобусы перавозчыкаў PKS Nova i Voyager. Даехаць можна і цягніком Polregio да станцыі Валілы (Waliły).
Арганізатарам фэсту з’яўляецца фонд TUTAKA. Мерапрыемства атрымала фінансавую падтрымку ад Міністэрства ўнутраных спраў і адміністрацыі Польшчы, Еўрапейскага Саюза, Фонду Маршала, Цэнтра Мерашэўскага і арганізацыі SVAE. Ганаровым патронам фэсту стаў прэзідэнт Польшчы Караль Наўроцкі.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
