Сябар беларускага акцёра Аляксандра Ждановіча (Маляваныча) трапіў у непрыемную гісторыю ў варшаўскім цягніку. Увайшоўшы ў вагон, ён хацеў купіць квіток, але не паспеў: да яго падышоў кандуктар і намагаўся выпісаць штраф. Здавалася, сітуацыя не на карысць хлопца, але ў выніку яна скончылася сумна для кандуктара. Як гэта адбылося, акцёр расказаў у сябе ў Facebook і падзяліўся падрабязнасцямі з MOST.
Сябра прыехаў да Ждановіча ў Варшаву ненадоўга. Акцёр тлумачыць: хлопец той дасведчаны і па Еўропе падарожнічаў шмат, у тым ліку і цягнікамі. Але па-польску зусім не размаўляе.
Ён зайшоў у вагон хуткаснай гарадской чыгункі, прыгатаваў тэлефон, каб набыць квіток. Але ў гэты момант увайшоў кандуктар, а сістэма перастала працаваць. Суразмоўца дапускае, што сістэму можна адключыць наўмысна.
— За два гады я не сутыкаўся з такімі з’явамі, але чуў пра іх, і не аднойчы — што кандуктары не даюць аплаціць. Вельмі нахрапіста дзейнічаюць. Нахрапістасць уласцівая не толькі польскім кандуктарам, дарэчы — гэта нейкая прафесійная рыса, — кажа акцёр.
Цягнік на той момант яшчэ нават не крануўся з месца. Але кандуктар заявіў, што хлопец не аплаціў праезд, і намагаўся выпісаць штраф. Сябар запярэчыў, на яго бок стаў іншы пасажыр, які бачыў, што той спрабаваў купіць квіток.
Тым не менш кантралёр настойваў на штрафе і пацягнуў хлопца на платформу. Ён патэлефанаваў Ждановічу. Той прызнаецца: думаў, што прасцей заплаціць штраф, бо наўрад ці ўдасца штосьці даказаць, калі выклікаюць паліцыю.
— Я ўвесь час быў на сувязі, каб ведаць, што адбываецца. Але даехаць не паспеў. Хвілін за 10 [да таго, як я б пад’ехаў] ён паведаміў, што ўсё вырашылася.
Паліцыю сапраўды выклікалі. Але, калі яна прыехала, сведка, што першапачаткова стаў на бок замежніка, вярнуўся і «падрабязна растлумачыў прадстаўнікам закону, што кантралёр не даў хлопцу магчымасць набыць квіток, абражаў яго “ўкраінцам, якіх панаехала”, сілай вымусіў выйсці з вагона. І паліцыянты папросту забралі разгубленага нечаканасцю развязкі кантралёра».
Цяпер Ждановіч кажа, што гэтая сітуацыя навучыла яго: «Варта адстойваць сваё меркаванне, калі ты ўпэўнены, што ты правы».
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
