10,7 тыс. беларускіх студэнтаў праходзілі навучанне ў польскіх ВНУ ў зімовым семестры 2025/2026 навучальнага года. Такія даныя станам на 31 снежня 2025 года прыводзяцца ў адказе намесніка міністра навукі і вышэйшай адукацыі Польшчы Анджэя Шэптыцкага на запыт намесніка кіраўніцы Аб’яднанага Пераходнага Кабінета (АПК), кіраўніка НАУ Паўла Латушкі.
Найбольш беларусаў вучылася ў Варшаўскім універсітэце — 490 чалавек. У лідарах таксама Універсітэт Марыі Кюры-Складоўскай у Любліне — 486, Універсітэт імя Адама Міцкевіча ў Познані — 453, Польска-японская акадэмія камп’ютарных тэхналогій — 405 і Ягелонскі ўніверсітэт у Кракаве — 391.
Акрамя таго, прынамсі 566 беларускіх студэнтаў здабываюць адукацыю ў медыцынскіх ВНУ Польшчы, а 54 беларускія навукоўцы і даследчыкі працуюць у польскіх акадэмічных установах.
Тым не менш прадстаўнік АПК па нацыянальным адраджэнні Павел Баркоўскі адзначыў негатыўны трэнд — скарачэнне колькасці беларускіх навучэнцаў за апошні год, што стала вынікам змены ўмоў прыёмнай кампаніі.
Павел Латушка лічыць, што беларусы, якія сёння атрымліваюць адукацыю ў Польшчы, — гэта значны інтэлектуальны патэнцыял для будучыні Беларусі.
«Тысячы маладых беларусаў сёння вучацца ў найлепшых універсітэтах Польшчы, якія таксама ўваходзяць у лік вядучых у Еўропе. Гэта наш велізарны інтэлектуальны патэнцыял для будучыні Беларусі, авангард, які здольны будаваць сучасную і квітнеючую дзяржаву. Усе гэтыя студэнты маглі б атрымліваць веды і працаваць дома, і наша краіна не страчвала б адны са сваіх найлепшых кадраў, калі б не рэпрэсіўная палітыка Лукашэнкі. Яна пазбаўляе перспектыў як Беларусь у цэлым, так і маладых людзей, якія імкнуцца жыць і развівацца ў нармальнай, дэмакратычнай і вольнай краіне» — падкрэсліў ён.
Намеснік кіраўніцы АПК асобна звярнуў увагу на больш як паўтысячы беларускіх студэнтаў у медыцынскіх універсітэтах Польшчы:
«Больш за паўтысячы беларускіх студэнтаў у медыцынскіх універсітэтах Польшчы — гэта сапраўды ўражвальная лічба, асабліва з улікам таго, які востры дэфіцыт лекараў мы назіраем зараз у Беларусі. Гэта тыя маладыя спецыялісты, якія маглі б у будучыні ратаваць жыцці беларусаў і развіваць нашу ахову здароўя, але праз злачынныя дзеянні рэжыму вымушаныя рэалізоўваць свае таленты за мяжой.
Вельмі спадзяюся, што пасля дэмакратычных зменаў у Беларусі атрымаецца забяспечыць умовы для вяртання многіх беларусаў з еўрапейскай адукацыяй дадому, дзе яны змогуць рэалізаваць свой патэнцыял, будаваць паспяховую кар’еру і працаваць на карысць нашай незалежнай дзяржавы».
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
