Лідарка палякаў у Беларусі Анжаліка Борыс і журналіст Анджэй Пачобут дзесяць месяцаў знаходзяцца ў зняволенні. 25 студзеня ў Беластоку прайшла чарговая акцыя ў іх падтрымку. Што казалі ўдзельнікі акцыі, чытайце ў матэрыяле MOST.
Анжаліка Борыс і Анджэй Пачобут былі затрыманыя ў сакавіку 2021 года ў Гродне. Ім інкрымінуюць рэабілітацыю нацызму. Па гэтым артыкуле ім пагражае ад 5 да 12 гадоў зняволення. У заключэнні яны знаходзяцца 10 месяцаў (300 дзён).
Вельмі мала інфармацыі
Цягам ужо некалькіх месяцаў у апошняй дэкадзе акцыі падтрымкі для Пачобута і Борыс у Беластоку арганізоўваюць іх калегі з Саюза палякаў. Адна з арганізатарак — Марыя Цішкоўская, яна таксама прайшла турму ў Беларусі, але была вызвалена і вывезена ў Польшчу. Жанчына лічыць, што такія акцыі даюць магчымасць чарговы раз заявіць пра сваіх калег, якіх сёння трымаюць у закладніках у Беларусі.
— Нас вельмі турбуе, што нашы лідары працягваюць заставацца ў зняволенні. Ужо дзесяць месяцаў яны ў турме. Да нас даходзіць вельмі мала інфармацыі пра іх. Кожны месяц мы стараемся арганізоўваць акцыі. Робім, што можам. Гэта цяжка, бо яны нічога не зрабілі, каб зараз з іх так здзекаваліся. Я ведаю, у якіх умовах яны сядзяць, я там была. Анджэй и Анжаліка духам моцныя, але фізічна ўжо слабыя. Павінна быць нейкае выйсце з усёй гэтай сітуацыі. Хочацца верыць, што наступным разам нам не давядзецца арганізоўваць акцыю і яны выйдуць на волю.
Лісты ад Анжалікі Борыс і Анджэя Пачобута ў Беласток не прыходзяць. Інфармацыя аб затрыманых паступае ў Польшчу хіба ад родных і адвакатаў.
Каштоўныя закладнікі
Гродзенец Сяргей Верамеенка асабіста знаёмы з Борыс і Пачобутам. Ён сам уцёк з Беларусі ад пераследу. Мужчына лічыць сваім абавязкам выходзіць у падтрымку затрыманых у Беларусі лідараў Саюза палякаў.
— Пакуль буду мець здароўе, я буду прыходзіць на такія акцыі. Гэтыя людзі сядзяць за сваю польскасць, грамадзянскую пазіцыю, і яшчэ яны сядзяць за свой край. А іх край — гэта не толькі Польшча, але і Беларусь. Вялікая колькасць палякаў, якія жывуць у Беларусі, лічаць гэтую краіну сваёй. Гэта вельмі важна, таксама як беларусы, якія жывуць у Польшчы, успрымаюць гэтую краіну сваёй. Тут гэта нармальная сітуацыя, а ў Беларусі, на жаль, не.
Сяргей не думае, што такія акцыі могуць наўпрост вырашыць пытанне вызвалення палітвязняў, але лічаць, што гэта можа дапамагчы дзейнічаць больш рашуча тым людзям, ад якіх гэта залежыць.
— Каб кіраўнікі еўрапейскіх краін ведалі, што ёсць людзі, якія выходзяць, якія стаміліся і не пагадзіліся. Гэта будзе штуршок. Анжаліка і Анджэй — гэта адны з тых знакавых людзей, грамадзян Беларусі, якія цяпер знаходзяцца ў закладніках. Яны вельмі каштоўныя для Лукашэнкі закладнікі, і я думаю, ён будзе прасіць за іх вельмі шмат. Таму іх зараз трымаюць і будуць трымаць да таго часу, пакуль рэжым не памяняецца.
Чытайце таксама
«Напішы ліст палітвязням» — пад такім лозунгам 23 студзеня праходзіла чарговая акцыя беларускай дыяспары ў Беластоку. Больш за сорак лістоў...
Чытаць далей
Чытайце таксама
«Напішы ліст палітвязням» — пад такім лозунгам 23 студзеня праходзіла чарговая акцыя беларускай дыяспары ў Беластоку. Больш за сорак лістоў...
Чытаць далейАмаль тысяча палітвязняў
Па стане на 25 студзеня 2022 года ў Беларусі палітвязнямі прызнаныя 995 чалавек (некаторыя зняволеныя яшчэ не прызнаныя палітычнымі). Блогеры, бізнесмены, актывісты штабоў кандыдатаў у прэзідэнты, пратэстоўцы знаходзяцца ў месцах пазбаўлення волі, удалечыні ад родных і блізкіх, таму што не баяліся ажыццяўляць свае правы — удзельнічаць у мірных сходах, выказваць сваё меркаванне і ўдзельнічаць у палітычным жыцці краіны. Большасць з гэтых людзей падвергліся палітычна матываванаму крымінальнаму пераследу ў сувязі з падзеямі, якія разгарнуліся падчас і пасля прэзідэнцкай выбарчай кампаніі 2020 года ў Беларусі.
