Другая ў гісторыі Беластока кандыдатка на пост прэзідэнта горада Катажына Штоп-Руткоўска абмеркавала з беларусамі, чаму сярод лідараў мала жанчын, што нават палякі недастаткова ведаюць пра ўнёсак жанчын у рух Solidarność і як фемінізацыя палітыкі можа паўплываць на грамадства.
Катажына адзначыла, што беларуская дыяспара для яе важная і таму, што яе бацька паходзіць з Гарадзеншчыны, і таму, што падзеі ў Беларусі ад 2020 года для яе як для феміністкі вельмі блізкія. Акрамя грамадскай дзейнасці, яна з’яўляецца доктаркай Інстытута сацыялогіі Універсітэта ў Беластоку.
— Дэмакратыя без жанчын — гэта толькі палова дэмакратыі. А гэта ўжо зусім не дэмакратыя, — адзначыла сацыёлаг. — Толькі ў 2000-я гады датычна руху Solidarność пачалі расказваць, што ў ім былі і жанчыны. Да гэтага гісторыя «Салідарнасці» была гісторыяй, з якой сцерлі жанчын.
На сустрэчы ўдзельнікі паглядзелі трэйлер фільма SOLIDARNOŚĆ WEDŁUG KOBIET, а Катажына каментавала ўбачанае. Яна адзначыла, што многія жанчыны аддавалі жыццё і кар’еры, каб з’явілася «Салідарнасць», але тысячы іх імён невядомыя шырокаму колу. Больш за тое, у перыяд, калі Лех Валенса з паплечнікамі ў адказ на саступкі былі гатовыя заканчваць страйк, менавіта жанчыны патрабавалі яго працягваць. Па словах Катажыны, нават многія палякі не ведаюць гэтага моманту ў гісторыі.
Менавіта жанчына атрымала найбольшы вырак падчас ваеннага становішча — дзесяць год прысудзілі Эве Кубасевіч. Найдаўжэй у вышуку была таксама жанчына — Ядвіга Хмялеўска. Сярод удзельнікаў NSZZ Solidarność жанчыны складалі 53%, але падчас Круглага стала на пасяджэнні ў блоку палітычных рэформ толькі адно месца атрымала жанчына з боку апазіцыйна-салідарнаснага.
Польская канстытуцыя адзначае роўнасць мужчын і жанчын. Катажына заўважыла, што паводле статыстыкі вышэйшую адукацыю маюць больш жанчын, чым мужчын. Але ў палітыцы мужчын па-ранейшаму пераважная большасць. У парламент, напрыклад, трапляюць не больш за 30% жанчын. Доктарка сацыялагічных навук адзначае, што ў гэтага ёсць некалькі прычын. Па-першае, жанчыны, па яе меркаванні, горш прадстаўленыя ў выбарных лістах. Па-другое, досвед працы наймальніцай у гарадскую Раду паказаў, што нярэдка жанчыны самі баяцца ісці на вядучыя пасады. Нават калі іх досвед і кампетэнцыі нашмат лепшыя, чым у кандыдата-мужчыны, многія адкажуць, што на пасаду знойдзецца хтосьці лепшы.
Спікерка адзначыла, што адна з прычын такога падыходу палягае на выхаванні. Калі хлопчыкаў рыхтуюць да актыўных роляў па-за межамі дома, то дзяўчынак праграмуюць на справы, звязаныя з домам і дзецьмі. Паводле Катажыны, падобныя патрыярхальныя і кансерватыўныя стэрэатыпы ёсць як у польскім грамадстве, так і ў беларускім. Але, па яе назіраннях, падзеі ад 2020 года паказалі беларусам, што жанчыны могуць быць раўназначнымі гульцамі ў палітычнай і грамадскай сферах.
Пані Катажына падзялілася меркаваннем, што жанчыны звычайна абіраюць іншы стыль лідарства, у якім нашмат мацнейшае «Мы», а не «Я». З сацыялагічных даследаванняў вынікае, што ў Польшчы сярод жанчын да 24 год больш тых, хто мае ліберальныя погляды, а сярод мужчын пераважаюць кансерватыўныя. З гэтага жартуюць, што так як яны не здолеюць паразумецца, то дэмаграфічны спад у Польшчы працягнецца.
Падчас імпрэзы ўдзельнікі абмеркавалі таксама тэмы касцёла, абортаў і іншыя. Госці задавалі пытанні спікерцы, а Катажына заклікала прысутных паразважаць аб ролі жанчын у дэмакратызацыі грамадства.
Чытайце таксама
Чаму ва ўладзе больш мужчын, а ў арганізацыях трэцяга сектара пераважна жанчыны? Якая якасць самая важная, каб стаць добрым лідарам?...
Чытаць далей
